O le asō e faatāua ai le tautua a tagata faigaluega uma a le Malo o lenei tausaga e pei ona sa faamanatu i le faai’uga o le vaiaso na te’a nei, sa manatua ai nisi o le aufaigaluega a le Malo ua loa tausaga o le latou auaunaga i le malo ma le atunuu.

O nisi o loo galulue pea e ui ua aulia tausaga e mālōlō litaea ai ma ua oo le tele o tausaga o le auaunaga a nisi i le 50, 40, 30, ma le 20 tausaga i totonu o matagaluega eseese a le Malo, aemaise le matagaluega o a’oga ma aganuu, ma le matagaluega o le soifua mālōlōina.

O le Minisita o leoleo falepuipui ma le toe fuata’ina sa ia momoli le faafetai i le aufaigaluega a le Malo i lona tulaga o le sui Palemia.

Le afioga Faualo Harry Jeffrey Schuster le minisita o leoleo falepuipui ma le toe fuata’ina o loo avea ma sui palemia.

O le aso faailogaina o tagata faigaluega a le Malo na tauaao ai foi faailoga e faatāua ai le mau tauave a le Komisi o galuega a le Malo ua atoa le tausaga o faatāua i le auaunaga a matagaluega o le Talofa ma le Laufofoga Fiafia poo le Talofa with a Smile.

O auaunaga sa maua faailoga i le maoa’e o le latou faatāua i lea mau tauave o le komisi o le toe fuata’ina o tulafono a Samoa, o le matagaluega o tiute ma tupe maua, matagaluega o faato’aga ma faigafaiva, matagaluega o galuega tele a le malo ma fela’ua’iga, ma le matagaluega o pisinisi, alamanuia ma leipa.

O isi auaunaga a le malo sa maua faailoga o le ofisa o le komesina o sulufa’iga, pulega o tagata tafafao mai fafo, pulega o uafu ma taulaga, faalapotopotoga faavae o fatuga’o le Samoa Kidney Foundation, ma le faalapotopotoga o suesuega faasaienisi le SROS.