E lata i le to’a 200 leoleo fesoasoani sa galulue soosootau’au ma le matagaluega o leoleo ma falepuipui e fesoasoani i le saogalemu ma le puipuiga o malo na Malaga mai ma le fonotaga a ta’ita’i o malo o le taupulega i le vaiaso na te’a nei.

Ma na faatautaia e le matagaluega se sauniga faafetai e amana’ia ai le sao o leoleo fesoasoani i le matagaluega.

Saunoa le komesina o leoleo o Auapaau Logoitino Filipo, o le sao o leoleo fesoasoani i le matagaluega ua atagia ai le mafai ona galulue faatasi.

E lē gata i lea ae na ta’ua e Auapaau o le a faatumauina pea le galulue soosootau’au o i latou ia ma le matagaluega i soo se taimi e mana’omia ai pe talimalo foi Samoa i nisi fonotaga faavaomalo i le lumana’i.

O le amana’iaina o leoleo fesoasoani na tufatufa ai tusipasi ae faapea o ni pine e fai ma faamanatu o lo latou sao i le fonotaga a le taupulega.

E lē gata i leoleo fesoasoani ae toe taliu uma le to’atele o alii ma tamaitai leoleo na malaga mai i motu tuaoi o le Pasefika e lagolago le matagaluega i le mata’itūina o le fonotaga ae faapea foi le malaga mai o le Tupu o Peretania Salesa III ma lana Masiofo.

Faaalia e Auapaau o se fonotaga o le a lē mafai ona faagaloina, ma o le galulue faatasi o le Pasefika atoa o se tasi lea o pine faamau o le lotogatasi o le aiga Pasefika e fesoasoani le tasi i le isi.