Na faaumiumi le lauga a le alii faipule o le vaega faaupufai o le Green Party, Teanau Tuiono i le tuu aloa’ia atu o le pili taufaaofi o le toe faafo’i mai o sitiseni o tagata Samoa na soifua mai i le tausaga 1924-1948 mo lona faitauga faatolu i le afiafi ananafi ona o le tolaulau ai ma ia faailo ai tagata eseese sa lagolagoina lea pili mai lava i le amataga.
I le toe folasia ai e lana afioga le faipule o le Green Party o le pili mo le vaega mulimuli na ia saunoa ai i le telē o le tāua o lenei faamoemoe, e pei o le toe faasa’o lea o ni faaletonu poo ni ‘aleu sa faatino i le tele o tausaga; e pei o le dawn raids,
Na faafetaia e Teanau le to’atele o sui faipule Pasefika aemaise o i latou o tagata Samoa o loo i le Palemene na o latou faasoa ma fetufaa’i i le finauina o lenei pili taufaaaofi.
Ae i le tolaulauina o nei sui e lei mafai ona galo i le alii Atu Kuki le sao ma le finau a le alii faipule o Faanānā Efeso Collins ua faiilagi le folauga.
Sa oo foi le folasaga a le alii o Teanau i le finau a le tinā o Falema’i Lesā, o lē sa ta’imua i lona finauina o lona sitiseni i le tausaga e 1978.
Molimauina e le toatele o sui o faalapotopotoga eseese a Samoa iinei i Niu Sila le folasaga a le alii faipule, ma na faafetaia ai tagata lautele o Samoa, i lo latou finau ma le galuega faatino lea ua taunuu ai ma le manuia taumafaiga.
Na pasia i le afiafi ananafi le pili taufaaofi lenei mo le toe faafo’i mai o sitiseni o tagata Samoa na aveesea i lalo o le malo a le alii o Robert Muldoon i le tausaga 1982.
Ma o lea ua faatulafonoina lea mataupu ma o le a mafai ona apalai i latou e agavaa, o ē na fananau mai i le aso 13 Me i le 1924 aga’i i le aso muamua o Ianuari 1 i le 1949.
