O se faaiuga o le vaiaso fiafia mo tagata Kiwi o loo nonofo i Ausetalia le tala ua sau o le a maua sa’o sitiseni e aunoa ma le tau faia muamua o le nofomau.
A o iai le Palemia o Niu Sila Chris Hipkins i Ausetalia, o le aso ananafi na faailoga ai lenei suiga, i se sauniga aloaia sa faia i Brisbane faatasi ma le Palemia o Ausetalia Anthony Albanese.
Mai le uluai aso o Iulai o le tausaga nei o lea o le a mafai ona faatalosaga sa’o tagata Kiwi o loo umia visa ua ta’ua o le Special Category Visa mo avanoa sitiseni, ma i lipoti e tusa ma le ‘afa miliona tagata Kiwi o loo i Ausetalia o le a agavaa ai.
E iai aiaiga e tatau ona faamalieina e aofia ai le tatau ona ausia o le 4 tausaga talu ona i Ausetalia faapea ai ma isi, ma e le iai se faatapulaa o tupe maua e tau faamalieina poo le itu tau le soifua maloloina foi.
O le a agavaa ai foi fanau a tagata Kiwi o loo soifua ane i totonu o Ausetalia e avea ma sitiseni mai le taimi e fananau ai, suia mai ai mai le faatali se’i atoa le 10 tausaga.
Ua toe faafoisia ai ma aiātatau a tagata Kiwi na iai muamua a o lei aveesea i le 2001 ma e le gata i sitiseni ae o le a agavaa ai foi i penefiti.
Fai mai le Palemia o Niu Sila, o se fiafiaga tele lea ma ua atili mafanafana ai le mafutaga a Niu Sila ma Ausetalia.
