O le feavea’iina o vailaau o tuipuipui mai le nofoaga autū o loo teu malu ai i le nofoaga o fualaau ma vailaau faafoma’i i le maota gasegase i Motootua, e tāua le malupuipuia ma ia saogalemu auā e umi ai o lelei vailaau.

O lea ua iai nei se loli e faapitoa lava i le faia o le galuega o le la’uina o tuipuipui i falema’i faaitumalo uma i le atunuu, o se foai na faatupe e le malo o Ausetalia ma le faalapotopotoga o le UNICEF.

Na faailoa e le Minisita o le Soifua Mālōlōina i le sauniga na tauaao ane ai lea fesoasoani i le matagaluega, e tāua tele le faia o tuipuipui o fanau, ma o faamaumauga ua ia tauaaoina ua iloa ai o loo maualuga le numela o fanau ua fai o latou tuipuipui o le faama’i misela.

Le Minisita o le Soifua Mālōlōina, afioga Valasi Luapitofanua Toogamaga Tafito Selesele.