O le aso ananafi lea na agai ai le fanau e momoli le feau e faatatau i suiga o le tau i le Palemene o Niu Sila.
Sa lipotia e le leitio faavaomalo a Niu Sila e 175 feau na tuufaatasia e le Save the Children, o se vaega o le latou campaign ua faaigoaina o le Message in a Bottle ma sa tuuina aloaia le latou feau i le minisita o suiga o le tau o James Shaw.
O le faamoemoe ia faasoa e le fanau mea o loo latou mananao ai i le lumanai ina ia silafia e o latou taitai ma fai iai se faatatau e uiga i suiga o le tau.
O feau e pei o le totō o nisi laau faaopoopo mo le maua ai o le okesene, o le fesoasoani e faaitiitia le pollution poo tulaga e aafia ai le siosiomaga, ma le aveesea foi o plastics, o nisi ia o feau taatele sa maitauina i le faamoemoe i le aso ananafi.
Ua faailoa o le masina fou o le a tuuina atu ai ia feau i taitai o le lalolagi i le fonotaga o le a faia, le UN Sustainable Development Goals Summit.
