O lea ua mae’a fausia le fale piliki ua mapu iai le afi eletise fou e silia i le 300 afe tala lona tau, mo le faaaogāina e le matagaluega o faamasinoga i lona ofisa autū i Mulinuu.
O se afi eletise o le a lē toe tuta’ia ai galuega tau faamasinoga pe a oo ina pē faafuase’i le eletise, e pei ona sa tula’i mai ia faaletonu i ni vaiaso ua tuana’i ma mafua ai ona faasoasoa i le taimi nei le maua o le eletise i le motu atoa o Upolu.
O le Aso Tofi o lenei vaiaso na umusa ai lea galuega e pei ona sa tatala aloa’ia le afi eletise faaleoleo e le tamaitai Minisita o Faamasinoga le tofa Matamua Vasati Sili Pulufana.
Sa iai le afi faaleoleo sa faaaogā ina ua faato’ā mae’a ona tatala ma faaaogā le maota ua iai nei le matagaluega o faamasinoga, peitai ua faaalia e le pulega ua leva ni tausaga e lē o toe faaaogāina ona ua faaletonu.
O le faaletonu o le auaunaga a le eletise ma aafia ai ma galuega a le faamasinoga, ua fetaui ma fuafuaga i le toe faatauina o se isi afi eletise e sili atu lona malosi mo le faaaogāina i taimi e motusia ai le auaunaga autū o loo maua mai le faalapotopotoga o le malosi faaeletise.
