Ua lua nei tausaga talu ona tatala le nofoaga ua faatau ai oloa taulima ma isi taumafaiga a le polokalame o le nofotane a le faalapotopotoga o le Toomaga mo ē Puapuagatia, ma o se nofoaga ua faatau ai ia oloa ae maua ai se fesoasoani tau tupe mo tina o le polokalame.
O le vaiaso nei na afea ai e le sui o le Iuni o Malo Europa mo atunuu o le Pasefika, le tamaitai o Barbara Plinkert ma le sooupu mo auaunaga tau faasalalau a le Iuni a Europa e molimauina lea taumafaiga a tina nofotane, o se polokalame sa fesoasoani iai mo lona faatinoina.
Mo le silafia o lea polokalame ua mafai ai ona faatuina nisi o atinae i totonu o nuu ma afioaga ua fai ma laveai i tina nofotane poo le au maupaolo.
O le afea e le sui o le Iuni a Europa o le nofoaga na faia ai se faatauga tele mai oloa eseese sa saunia e tina o le polokalame, ma o se isi seleni faaopoopo lea mo i latou.
