Ua faailoa e leoleo e to’atolu le aualii na taumafai e sosola ese ma leoleo e ala i lo latou ā’ea o le taualuga o se taulaga faatau ina ua feta’ua’ina le maua atu o gaoia pisinisi i lea nofoaga.
Faailoa i lipoti a le One News pe o le 11 i le po anapo na logo ai i latou e sikulati i le taulaga faatau i Magele i tagata e to’atolu ua ulufale faamalosi i le taulaga faatau.
O faamatalaga a leoleo ua ta’ua ai sa feta’ua’ina pe ā ma le 5 pisinisi na o latou osofa’ia ma aveese mai ai aitema e aofia ai lavalava ma pusa tupe.
Na saunoa le leoleo asiasi lagolago, Clint McCarthy i lea lipoti, ina ua taunuu leoleo na o latou vaaia se kulupu o tagata o loo fe’a’ei ane i le taualuga mai totonu o le fale.
Na taumafai atu leoleo e faasufi e o ane i lalo mai le taualuga ae taumafai se tasi o i latou ia e sola ese ma maua ai loa e leoleo.
O le isi to’alua na i’u ina gaua’i ane i le faatonuga a leoleo ma toe o ifo ai i lalo ae tuu ai oloa na gaoia i luga o le taualuga faato’ā ave ane mulimuli e leoleo.
O le asō la e tutula’i uma ai le to’atolu lea e 18, 19 ma le 23 tausaga le matutua i le faamasinoga i Manukau i moliaga o le gaoi.
Na faafetaia e leoleo le galuega a sikulati i le taulaga faatau ua vave ai ona maua i latou ia ma pu’eina.
Puna o Faamatalaga: https://www.1news.co.nz/2024/10/07/alleged-burglars-tried-to-escape-police-by-climbing-shopping-centre-roof
