O pitonuu ma taulaga i Saute i Sasae o Kuiniselani ma le itu i Matu o Niu Sa Uelese na aafia i le afā o Alfred.
Ua manino mai i ata mai le televise ma ofisa faasalalau aafiaga o le afā i faaitu na aafia ma ua maitauina o lologa lava o loo matele ina tele ai aafiaga i ia faaitu.
E tele magāala o loo tapunia pea e oo mai i le asō atoa ai ma le amata o galuega faamāmā mai isi pitonuu. O loo faasalalauina ua oo i le faitau piliona le tau o mea ua faaleagaina ma o loo tele pea lapataiga mo lologa i lea itu o Ausetalia.
Ua anoanoai fale ua motusia mai ai le eletise ma o le Gold Coast le faaitu o loo taua mai sa faatetele iai aafiaga mai le faaiuga o le vaiaso. E toatasi si tama ua maliu ina ua tafea lana taavale i lologa i Niu Sa Uelese i le Aso Faraile.
E 18 tausaga o se alii talavou o loo tau sailia mai le faaitu o Logan i le po anapo. Talu mai lapataiga o le afā o Alfred, sa vaaia pea i faasalalauga le toatele o tagata o loo agai pea i le sami mo matamataga ao faatetele ane le afā.
O loo iai nai fitafita e toalua o loo i se tulaga tigaina i le falemai ina ua lavea se taavale a le vaega o le puipuiga i le itu i Matu o Niu Sa Uelese i le faaiuga o le vaiaso ao feagai ai ma galuega lavea’i.
Puna o Faamatalaga: https://www.9news.com.au/national/ex-cyclone-alfred-2025-flood-emergency-south-east-queensland-northern-nsw-updates-warnings/1ce5b96f-ed35-45a0-8fba-ceb17560ae72
