Ua faaleaogaina uma le malumalu a le Ekalesia Faapotopotoga Kerisiano Samoa i Patamea i Savaii ina ua aafia i se afi tele masalomia o se faaletonu i uaea eletise. 

Taua e le Komesina o le Pulega o Tineimu ma Faalavelave Faafuasei ia Tanuvasa Petone Mauga o le itula e 5 i le vaveao o le Aso Toonai i le faaiuga o le vaiaso na maua ai le ripoti i lea faalavelave ma na tali atu ai Ofisa o loo i Maota ma Asau i Savaii.

Taua foi e Tanuvasa na auai atu foi vaega o le au suesue faapitoa e saili poo le a le mafuaaga o lea afi ua aafia ai le malumalu a le Ekalesia. Faailoa e le Komesina o loo faaauau pea suesuega i le faalavelave peitai o sailiiliga lē aloaia poo preliminary investigations o loo masalomia ai o se faaletonu i uaea eletise na afua ai lea mū.

Na taua e se sui o le aiga i le Samoa Global News o le malumalu lea i Patamea na maea i le tausaga e 2004 ma o le tausaga na te’a na patipatia ai e le Ekalesia le maea ona totogi o a latou mokesi peitai o lea ua faaleagaina i le afi.

O le Ekalesia EFKS i Patamea o loo taitaia e le susuga i le Tanielu Tupusē ma le faletua ia Tuvalu Soli Tupusē.