O le faalavelave lea na tulai mai i Tafatafa Falealili ia Mati o le tausaga na tea nei, ma maliu ai se taulealea ae manunu’a tigaina isi taulelea e toalua mai se agaese, o le masina nei o Aperila ua aumai ai se faasalaga o lē na molia o se tamā e 51 tausaga le matua ua fai lona aiga ma e toalima lana fanau.
O Nuuuli Lopesi e 4 moliaga na tuuaia ai e leoleo e aofia ai le solitulafono o le fasioti tagata pa’ivalea, 2 moliaga o le faaoomanu’a tuga ma le moliaga o le umia o se aupega matautia.
O lana gaioiga e pei ona faailoa e leoleo i le faamasinoga o lona umia o se agaese o se sapelu, na ia faaoo ai ni manu’a tuga i le taulealea na maliu e 25 tausaga le matua o le nuu o Lotofaga, ae faamanu’alia isi alii talavou mai lea lava afioaga i le aupega lava o le agaese na faaaogā i le faalavelave.
Na mafua ona tulai mai le solitulafono ona o faamaumauga a leoleo o loo faaalia ai, o taulelea na aafia i le faalavelave sa malaga ese ma Lotofaga i le taeao o le Aso Sa ma agai loa e tafafao i le matafaga i Tafatafa Falealili.
O se tafaoga na tagofia ai le avamalosi ma e faapea mai faamaumauga o se fagu malosi o le Niu Vodka sa latou inuina.
Na ta le latou musika ma saofafai i totonu o le taavale na malaga ai, ae faalogoina loa ua togi le latou taavale i le maa.
Na toe palasi isi maa i le taavale ma o ese faavave ai loa i fafo taulelea ma agai le isi toalua i se togavao lata ane ma tauvalaau e lu’i le tagata o loo tau’aina le latou taavale.
Faaalia e leoleo o le isi taulealea na tamoe i le isi itu ma laulauvavale ma valaau i le tagata o loo tau’aiina le taavale e alu atu.
Na liliu Nuuuli ma agai i lona fale ma alu ane loa ma le agaese, lea na ia osofai muamua ai le tasi o taulealea, toe liliu atu i le isi ma faapena foi ona faaoo iai lona toatamai.
O le isi taulealea lea na maliu e faapea na lavea ma palasi i lalo ua le mafai ona tamoe ese, lea sa faatino iai gaioiga a lē ua nofosala ma afaina ai le uaua malosi o lona ua i se manu’a ogaoga ma tele ai se palapala na alu ese mai lona tino. O le mafuaaga lea o lona maliu e tusa o le lipoti a le fomai.
O isi taulelea e toalua na taofia i le falemai mo togafitiga o o la manu’a ma tetea ai i tua. E pei ona silafia o le faalavelave lenei na mafua ai se ifoga a le aiga o lē ua faasalaina i le falepuipui ma na faatāua lea tu ma aga a Samoa i le faaiuga o se itu lelei mo lē ua molia.
Peitai o le ogaoga o le solitulafono ua faatino ai le togisala o le nofo i le falepuipui mo tausaga e valu.
Sa tetee Nuuuli i moliaga uma ae o Oketopa o le tausaga ua mavae ina ua faatulaga e suesue molimau a leoleo, na suia ai lana tali i le ioeina o moliaga e fā.
