O le va o le fogavaa i le lotoifale o le pati faaupufai o le Faatuatua i le Atua Samoa ua tasi ua faaauau pea, ina ua faamuta ai e le Palemia tofiga Minisita Lagolago o le 13 o sui faipule o le faafaletui.

E to’avalu mai itumalo palota i Savaii ae lima mai itumalo palota i Upolu.

O ia sui faipule ua lē toe avea ma minisita lagolago o le afioga Maiava Fuimaono Tito Asafo, Fesola’i Apulu Tusiupu Tuigamala, Ale Vena Ale, Tu’uu Anasii Leota, Foisala Lilo Ioane, Tagaloatele Pasi Poloa, Fuiono Tenina Crichton, Tea Peato, Seuamuli Fasi Toma, Magele Fiaui Sekati, Agaseata Tanuvasa Peto, Manuleleua Paletasala Tovale, ma Masinalupe Makesi Masinalupe.

O ia sui faipule mo le silafia o loo tumau pea o latou tofi i le tauaveina o nofoa o o latou itumalo i faalagamaea o upufai o malo i totonu o le Palemene.

Ua toe faafoi uma meatotiono a le malo sa latou faaaogāina e pei o taavale, ma ua logo foi iai e ala i tusi mai le Palemia i le toe foi i totogi o sui faipule.

O le 13 o minisita lagolago ua faamuta o latou tofiga o loo lagolagoina le vaega to’atele o faipule o loo avea ma sui o le vaega faaupufai o loo tu i le foe o le pulega o le malo, ae to’aono faipule e aofia ai le Palemia ma le Sui Palemia ma minisita e to’afā ua faia le faai’uga a le faafaletui e faamuta le toe avea ma sui o le latou vaega faaupufai.