O lea ua faamautū le lagolago a Samoa i taumafaiga e tali atu ai i suiga tetele o le tau, e pei o le faaitiitia o kasa kaponi e faaleagaina ai le osone o le lalolagi i le faaaogā o taavale e ola i le eletise.
E 76 taavale e ola i le eletise ua taunuu ma ua faatupe i se poloketi a le Malo o Iapani ae lagolago iai le faalapotopotoga o atina’e a Malo Aufaatasi le UNDP.
O ia taavale na faalauiloa i le nofoaga autū o auaunaga eseese a Malo Aufaatasi i Tuanaimato, le One UN House i le afiafi o le Aso Tofi o le vaiaso nei.
O se poloketi ua faatupe e Iapani ma ua aofia ai Samoa ma isi atunuu e tolu e pei o Timoa Leste, Vanuatu ma Papua Niu Kini.
O le Matagaluega o Galuega Tetele a le Malo o loo lotolotoi i lea poloketi ma o le minisita foi o lea matagaluega o le saunoaga autū lea o le sauniga na faalauiloa ai ia taavale e ola i le eletise, o le a muamua faaaogā i le taimi o le fono a Malo o le Taupulega.
Le tofa Olo Afoa Fiti Vaai, o le minisita o Galuega Tetele a le Malo.
E iai le talitonuga o le isi 10 tausaga o muamua, o le a telē se suiga o le a iai Samoa i le siitia o le numela o ia ituaiga o taavale o le a faaaogā e lo tatou atunuu.
