Ua silia ma le 3 masina talu ona pāsia e le malo o Niu Sila le tulafono taufaaofi o le toe faafoi ai o sitiseni o tagata Samoa na aveesea i le tausaga 1982, ae ua silia ma le 400 tagatānuu Samoa ua mae’a ona faatino ma ua maua o latou sitiseni.
Na ta’ua e le Ofisa o le Internal Affairs a Niu Sila, e silia ma le 950 tusi talosaga mai tagata Samoa na fananau mai le tausaga 1924 aga’i i le 1948, o i latou na faamauina le aveesea faamalosi o a latou sitiseni e le faigamalo sa iai i le tausaga 1982, i lalo o le ta’ita’iga a Robert Muldoon.
Ua faamauina i lipoti mai le leitio faavaomalo a Niu Sila, na ta’ua e le Faatonu Sili o le ofisa o le Internal Affairs, Adrian Jarvis, o loo galulue soosoo tau’au lo latou ofisa ma le Matagaluega o le Va i Fafo e faia ni a’oa’oga mo sui o le ofisa o le Komesina Maualuga o Niu Sila i Apia i vaega uma i le faatinoina o pepa talosaga ma le tele o itu e faafesili ai le to’atele i le sitiseni.
Na faamanino mai foi e Jarvis, o pepa talosaga uma e avatu i le Ofisa o le Komesina Maualuga, ona faia lea o le galuega o le lafo mai i Niu Sila mo iloiloga ma le faagasoloina o le pitolaau o le ofisa, ma e ta’ua e 1 i le 2 vaiaso le umi e faatali ai se tali o le talosaga.
Puna o Faamatalaga: https://www.rnz.co.nz/international/pacific-news/542453/over-400-samoans-reclaim-nz-citizenship-since-law-change
