A o tapena aulakapi ta’ito’afitu a le Manu Samoa i le vaega o alii ma le Manusina i le vaega o tamaitai i le taamilosaga a atunuu o le Oceania e faia i Solomona i le aso 7 ma le aso 8 o le masina fou o Tesema.
Ua faailoa le lagolago a le kamupani o le Federal Pacific Group poo le FedPac e 60 afe tala, e fesoasoani ai i tapenaga a ia aulakapi e lua a le atunuu.
O se fesoasoani ua faamatalaina o le a una’ia ai i se tulaga lelei tapenaga a le au ta’ito’afitu a le Manu Samoa lea e leo toe mamao ona faailoa lea o le au ua filifilia, ina ua maea le taamilosaga lakapi ta’ito’afitu i Aukilani Niu Sila i le faai’uga o le vaiaso na te’a nei.
Na faaalia e le tofa Seumanu Douglas Ngau Chun o le pule o le High Performance Unit a le Lakapi Samoa o le tāua o le lagolago a le FedPac Group o le a malosi ai le tapenaga a ‘au a le atunuu mo le taamilosaga a le Oceania.
E pei ona silafia e tāua tele le taamilosaga lea mo le aulakapi fitu a le Manu Samoa e toe sa’ili ai sona avanoa e ulufale ai i le taamilosaga tele faaavaomalo o le lakapi ta’ito’afitu.
O le tofa Namulauulu Papalii Leota Sami Leota na fai ma sui o le kamupani o le Federal Pacific i le tauaaoia o le fesoasoani tupe.
