O tapenaga a Samoa i le Fono a Malo o le Taupulega ia Oketopa, o le saunia o meataumafa o se tasi lea o vaega tāua e tatau ona matuā tapena lelei iai i latou o le a feagai ma gasesega, auā o le itu tāua o le tausia o le tulaga maualuga o le soifua mālōlōina.
O le pepa o faamaumauga o ia tapenaga na faamauina i le aso 23 o Iulai, o loo faailoa ai e 6 auaunaga tuma’oti tau pisinisi o loo feagai ma le saunia o meaai poo caterings i totonu o le tatou atunuu ua faamautu o le a tautuaina le fofoga taumafa i le taimi o le Fono a Malo o le Taupulega.
O ia auauna tuma’oti e ono e aofia ai le Denzal Catering & Services, Manumailagi Garden Events Venue, Osana Chips and Catering, Inalani Catering & Car Rental, Dani’s Cuisine, ma le Roko’s Restaurant.
Na ave le faalauiloa a le komiti o feagai ma lea tapenaga i auaunaga tuma’oti uma faapea, ia tuuina atu so latou manao pe fia avea ma se tasi o pisinisi tau catering e faia lea galuega poo le Expression of Interest le EOI, ma ua faaalia ai i le pepa o faamaumauga o tapenaga o i na faamautu ai le filifiliga o ia pisinisi e 6 e faia lea auaunaga tāua i le taimi o le fono.
O nofoaga uma poo venues o le a faatino ai vaega o le Fono a Malo o le Taupulega, o le a iai ma lea tautua.
O le aso 26 o Iulai e pei ona faailoa i le pepa o faamaumauga sa fono ai le komiti ma sui o ia pisinisi e saga faamautu a latou tapenaga.
O loo ave foi le faalauiloa i pisinisi tuma’oti e maua ai le auaunaga o fagu vaitaumafa e talosaga ai e ala i le expression of interest.
