Ua amata tuli le faasalaga e 4 tausaga i le falepuipui o se alii avepasi toe inisinia o afi o taavale, sa ia ioeina le moliaga o le ave taavale faatamala, na mafua ai ona maliu se tina sa ma’ito i le taimi o le faalavelave.
E lē gata ina ioe Fatu Manino Aiono 27 tausaga i le moliaga o le ave taavale faatamala ua maliu ai se tagata, ae sa ia ioe foi i lona ave o le pasi ae leai sona laisene na te faafoe ai le pasi, sa alu e la’u ma toe momoli tagata o le taaloga bingo i le po na tupu ai le faalave i le masina o Me o le tausaga e 2021.
O se taaloga bingo sa faia i Faleasiu na galue ai le pasi sa aveina e lē ua molia ma faasalaina, ma e faapea mai faamaumauga a leoleo, o le taimi na solomuli ai ina ua uma ona tuu nisi o le taaloga, na lavea ai lē ua maliu, o se tina e toaono lana fanau ma o le 38 vaiaso o lona ma’itaga na maliu ai i le faalavelave.
Sa tagofia e lē ua nofosala le ‘ava malosi i le po na fealua’i ai i le pasi mo le la’uina ma le toe momoli o tagata o le taaloga bingo.
