O le amataga o le vaiaso fou ua faatulaga e taunuu ai i Samoa le aumalaga o leoleo e 35 o le malo o Fiti, o le a galulue i lo tatou atunuu e lagolago i le galuega a leoleo i Samoa i le itu i le puipuiga o le Fono a Malo o le Taupulega.
O le amataga o lenei vaiaso na faailoa ai i upega tafa’ilagi a leoleo o lea malo, le feagai ai o ia leoleo i Fiti ma ni a’oa’oga o loo tapenapena ai mo le malaga mai e galulue i Samoa.
Ua ave iai fautuaga a ta’ita’i ma faauluuluga o le matagaluega o leoleo i Fiti ina ia faatino le amio tausaafia ma le amio pulea e ala i le usiusitai ma faalogo a o avea i latou ma avefu’a o le malo o Fiti i le leoina o le saogalemu ma le puipuiga o ta’ita’i ma usugafono a malo e 56 o le taupulega.
O le a galulue uma le 35 lea o leoleo o le malo o Fiti i le ta’ita’iga a le Matagaluega o Leoleo, Falepuipui ma le Fuata’ina i le taimi o le a galulue ai i Samoa mai le amataga se’ia oo ina mae’a le Fono a Malo o le Taupulega.
Ua aofia i le aumalaga o leoleo a lea malo tuaoi nisi ua iai tomai a’oa’oina i le faaaogāina o uilaafi mo tiute o le faafeaoina o malo taualoa.
