Ua mae’a nei se isi galuega tele a le malo o se isi maota e faaee ma faatali ai pasese mo vaalele laiti e pei o le ituaiga o le twinotter lea o loo feoa’i i le va o Samoa ma Amerika Samoa, ae e avanoa foi ona taunuu ma malaga ese ai pasese mo vaalele tetele 737-800.
O le vaalele o lea ituaiga a le kamupani vaalele o le Fiji Airways, na taunuu i lea nofoaga fou i le malaevaalele i Faleolo i le Aso Tofi o le vaiaso nei, ma tatala aloa’ia ai lea galuega e 25 miliona tālā lona tau atoa.
O se nofoaga ua fausia i se tasi o vaega o le fanua o loo iai le malaevaalele faavaomalo o le atunuu sa lē faaaogāina i le tele o tausaga.
Ua talafeagai le tatala o lea maota faatalivaa ma faaee ai pasese e tuua Samoa, ma le taunuu mai o usugafono mai fafo mo le Fono a Malo o le Taupulega, lea o le a tutū i lea nofoaga fou o latou vaalele o le a malaga mai ai.
O le ta’ita’i o le Malo na saunoa e tatala lea galuega na faatupe lava e le pulega o malaevaalele, ma ua lua ai galuega tetele ua faatupe e lea auaunaga tuma’oti a le Malo.
O ni vaiaso e le’i mamao atu na tatala ai le maota e faapitoa i malo taualoa e taunuu ma malaga ese ma lo tatou atunuu ma sa faatupe foi e le pulega o malaevaalele.
Le afioga i le tamaitai Palemia, Afioga Fiame Dr Naomi Mataafa i se vaega o lana saunoaga autū na tatala ai lea galuega tele.
O le afioga i le Minisita o Galuega tetele ma fela’ua’iga e aofia ai le pulega o malaevaalele le tofa Olo Afoa Fiti Vaai, na ia ooti le lipine e aloa’ia ai le tatalaina o lea galuega.Na tauaao ai foi e le pailate o le kamupani vaalele o le Fiji Airways, o se tamafanau a Samoa se meaalofa o se vaalele o le faatusa o le fausaga fou poo le model o le vaalele 737-Max 8 a le kamupani vaalele a Fiti.
