Ua sauni le leitio faavaomalo a Niu Sila e taliaina se tasi o fesoasoani tele mo lona faatupega ina ua faailoa ua le taunuu le tuufaatasia o le RNZ ma le Televise a Niu Sila TVNZ, o se faaaliga na faia e le minisita o faasalalauga, Willie Jackson i le aso ananafi.
O le a maua la e le leitio se isi vaegatupe faaopoopo e $25.7miliona i le tausaga ma o lea vaegatupe ua aofia ai ma le $12 miliona e faatumauina ai pea le auaunaga faalauaitele, $12 miliona mo se isi digital platform fou atoa ai ma le $1.7 miliona mo faasalalauga i le AM.
O le NZ on Air o le a maua le $10 miliona faaopoopo mo le tausaga faaletupe 2023/2024.
Saunoa le minista o le folasaga i le aso ananafi ua faauigaina o le a faasaoina mai se vaegatupe e $364.7 miliona i totonu o tausaga e fā e faatusa atu pe ana fai e taunuu le tuufaatasia o auaunaga faasalalau ia e lua.
Sa faailoa e Jackson o le lagolagoina o le RNZ ina ia faaauau pea ona maua le auaunaga tau faasalalauga faalauaitele e faamalieina manaoga o tagata Niu Sila e matuai tāua tele.
O loo ta’ua i le lipoti o nisi faamaumauga tuufaatasi o tupe faaalu pe ana tuufaatasia ofisa faasalalau e lua e toeitiiti alu ai le $20 miliona o tupe a le lautele.
