Ua faalauiloa aloa’ia nei le fesoasoani a le Malo e tauala mai i le Komisi o tagata faigaluega a le Malo, o le a fesoasoani ai e totogi ni avanoa sikolasipi mo fanau a le atunuu e a’oa’oina tomai tau faato’aga i totonu o le lālā o le Iunivesite a le Pasefika i Alafua le USP Samoa Campus.
O le vaiaso nei na faailoa ai ia avanoa sikolasipi e 21 lea o le a faamanuiaina ai fanau e 12 o loo sa’ilia le faailoga o le Bachelor i tomai tau faato’aga, to’alima fanau i le vasega faavae le Foundation mai le motu o Upolu, to’atolu fanau i le vasega lava lea mai le motu i Savaii, ma le tagata e to’atasi o loo sa’ilia faailoga tipiloma i tomai tau faato’aga le Postgraduate Diploma in Agriculture.
O le ta’ita’ifono o le komisi a tagata faigaluega a le malo le afioga Nonu Lemauga Saleimoa Vaai na saunoa i le sauniga na faalauiloa ma tauaao ai ia avanoa sikolasipi i fanau ua faamanauiaina ai, ma ia faailoa ai le silasila mamao o le malo ia siitia le tomai o fanau a le atunuu i le atina’e o faato’aga o le ivitu o le tamaoaiga o Samoa.
O ia foi sikolasipi e pei ona faailoa e le ta’ita’ifono i se faasalalauga i auala o fesoota’iga a le Komisi o tagata faigaluega a le malo, o le lagolago lea a le malo i le atina’e o le tamaoaiga o le tatou atunuu.
O le Faatonu o le lālā o le Iunivesite a le Pasefika i Samoa le afioga Tootooleaava Dr Fanaafi Aiono Le Tagaloa sa ia faafetaia le Malo ma le komisi i le lagolago atu i le una’ia o le ola a’oa’oina o fanau a Samoa i le tomai tau faato’aga, ma ia fautuaina ai fanau ua maua ia avanoa sikolasipi ina ia finafinau ma tauivi ina ia a’e manuia o latou faiva.
Ua momoli ai foi ma faamanuiaga a le komisi o tagata faigaluega i fanau ina ia manuia foi lo latou taumafai i lenei tausaga.
