Ua faasala tupe e le Faamasinoga Maualuga le tofa Maulolo Tavita Amosa ma isi matai e to’atolu o le nuu o Afega na faamaonia i se faai’uga a le faamasinoga ia Tesema o le tausaga na te’a nei, ua latou lē usita’ia le poloa’iga na faatonuina ai e taofi le toe faia o ni galuega i fanua o loo finau ai ma le afio’aga o Leauvaa.

O lea poloa’iga na faia e le Faamasinoga Maualuga ia Oketopa o le tausaga lava na te’a nei.

O le Aso Lulu o lenei vaiaso na fofogaina ai le faai’uga a le Faamasino Sili le afioga Satiu Simativa Perese e pei ona poloa’ina ai matai na molia le tofa Maulolo Tavita Amosa, afioga Ututaaloga Charlie Ulia, ma le tofa Fata Roketi ma Fata Vaafai Tolutasi e totogi le salatupe e lua afe tala i le lesitala o le faamasinoga ia lē silia aso e 14 e amata atu i le aso na fofogaina ai le faai’uga.

Ae i le totogi poo cost a le faamasinoga e tasi le afe lima selau tala ua fautuaina le itu na faasaga iai le tagi latou te totogi i le itu na faauluina le mataupu lenei tau faamasinoga poo le itu lea a alii ma faipule o Leauvaa.

O le totogi lea o le gaioiga na soli ai le poloa’iga, ae o le lima selau tala o le totogi lea o le talosaga na faaulu sa finau ai le itu na tuua’ia e faasee ese le Faamasino Sili mai lona tauaveina o su’esu’ega o o latou moliaga.

I le itu lava i le totogi ua fautuaina foi e le faamasinoga le itu na tagi latou te totogi i le itu na faasaga iai a latou tuua’iga, le lima selau tala, e mafua i le latou talosaga na manana’o ai e faaofi se isi talosaga e molia ai se matai o Afega ma lona atalii, ma o se talosaga na teena e le faamasinoga.

O ia totogi uma ua faailoa e le Faamasino Sili i le lauina o lana faai’uga o loo tuu avanoa ai i itu sa auai e feutaga’i e ala ia latou loia pe totogi ia tau poo cost pe leai. 

Ae i le faai’uga ua aumai ua faailoa e le Faamasino Sili o le itu sili ona tāua na faia ai le poloa’iga o le tausia e itu uma o le nonofo filemu a o tālia ai se aso e fofogaina ai i le Faamasinoga o Fanua ma Suafa mataupu o loo oia ai le lotoifale o Leauvaa ma Afega ona o se vaega o fanua o loo taofi eseese ai.

Ua faailoa foi le faafetai a le Faamasino Sili i le faatoesega ua tuuina atu e Maulolo Tavita Amosa ma matai na molia ona o gaioiga na latou faatino ma aafia ai meatotino a nisi o aiga.

Faaalia e le afioga i le Faamasino Sili o le itu tāua lea ia te ia, ua ta’utino i latou na molia i le sese o le latou gaioiga na faia.