E 44 tausaga o se tamā lea ua tuuina atu ai le faaiuga a le faamasinoga maualuga e nofosala i le falepuipui mo le 20 tausaga ina ua faamaonia lona faia o ni faiga aiga faamalosi i lona lava afafine.
E 32 le aofai o moliaga o le faia o uiga mataga ua molia ai lenei tamā lea na ia faia i lona afafine ao 17 ai tausaga o lea tamaitai. Taua i ripoti e lē tasi lē lua ona faia e lea tamā uiga mataga i lona afafine ae ua tele taimi.
E lei alo faamatalaga a le alii faamasino Ia Fepuleai Ameperosa Roma na faia i lea tamā i totonu o le potu faamasino. E le’o mafai ona faailoa le suafa o lea tamā ona o puipuiga o le tamaitai na aafia.
Taua e Fepuleai “O fanau teine e tatau ona malu i totonu o latou lava aiga aemaise lava i lalo o le vaavaaiga a se matua. O se tasi o itu leaga o lenei mataupu o le talitonuina lea e lou afafine o oe lona tamā e puipui ia te ia peitai ua e solia”.
O le faalavelave muamua na tulai mai i le tausaga e 2017 ina ua fafagu i luga e lea tamā lona afafige ao 17 tausaga i lea taimi ma faatonuina o ia e alu i le isi potu ma faia ai uiga mataga i lea taimi. I le tulai soo mai o nei mataupu faapea i totonu o aiga na faafefe e lea tamā lona afafine na te fasioti (sei tulou) ia te ia pe a talanoa i se tasi i le mea na tupu aemaise lava i lona tinā.
I le ripoti a leoleo na amata tupu mai nei faiga lē alofa ia Ianuari 2017 seia oo i le masina o Aukuso 2019. Na amata ona iloa nei gaioiga ina ua talanoa le tamaitai na aafia i le toalua o lona tulaga e matua ma faamatalaga ai taimi e tele ma faamalosi ai o ia e lona tamā.
Na amata mai i le 30 tausaga i le falepuipui le faasalaga na tuuina atu i lea tamā peitai na toe toese isi tausaga e 10 ona ua maea ona faia le faatoesega i le aiga, ua maea foi on a totogi le sala tupe e $2000 tala i le nuu, o lona ioeina o moliaga ma o le taimi muamua lenei ua molia ai i le faamasinoga.
