I le 30 tausaga ua mavae talu ona maua e le taitai aoao o le Ekalesia Worship Center le afioga i le aposetolo susuga Viliamu Mafoe le faaaliga mai le Atua e faatu se ekalesia, o le Aso Toonai na tea nei na faaatoatoa ai lea faaaliga, ina ua faaulufale le Malumalu o le ekalesia i Samoa ma le lalolagi ua mae’a fausia i se fanua o se meatotino a le ekalesia i Sogi i le agai i Mulinuu.
E silia i le tolu tausaga o fausia le galuega ile tau e 20 miliona tala ma o se Malumalu o fausaga faaonapo nei e le gata i le tino o le fale, a’o le anofale i masini faaonapo nei mo le faasalalauina o sauniga lotu. O lona lotoifale e maofa le toatele na auai i le umusaga ona o vaaiga muamua ia ua latou molimauina ise Malumalu tele faapea ua i Samoa.
O le afioga i le taitai o le Malo, le afioga i le tamaitai Palemia Fiame Naomi Mataafa sa auai, o le taitai o le Itu agai susuga Tuilaepa Lupesoliai Sailele Malielegaoi ma nisi o sui o pisinisi o paaga a le ekalesia sa tuu atu le lagolago a’o faatino le galuega.
O le Malumalu o le ekalesia Worship Center i Sogi ua fausia ma faatuina i se eleele sa avea ma taulotoaiga o pisinisi tau faletalimalo i tausaga e tele ua mavae sa faaigoa o le Apian Way lea sa tuaoi ma le faletalimalo o le Tiafau Hotel.
