Ua fusi ma sapai e le Malo o Samoa le foa’i a le Malo o Niu Sila o le masini fā’ata e su’e ai tagata malaga, ma uta i le malaevaalele faavaomalo i Faleolo.
Ua mafua ona sagisagi fiafia le tatou Malo ona o se foa’i e taugata e 2 miliona tala, ae leai se tupe a lo tatou malo o alu ai.
E lē gata e taugata le masini fā’ata ae e 3 tausaga o le a mafai ona faaleleia ai e le Malo o Niu Sila ni vaega e faaletonu.
O le tamaitai Palemia le afioga Fiame Dr Naomi Mataafa na ia ooti le lipine e tatala ai lea galuega ua mae’a ona faapipii ai le masini fā’ata, ae na saunoa foi ma momoli le faafetai i le Malo o Niu Sila i lona agalelei i le faaleleia o auaunaga a le pulega o malaevaalele aemaise o le itu i le puipuiga.
O se masini ua fetaui le amata faaaogā ma le tu lalata atu i le masina o Oketopa o le a toatele ai tagata malaga e afea Samoa ona o le fono a ta’ita’i o Malo o le Taupulega.
Ua faailoa i se pepa o faamatalaga o le masini fā’ata fou o le a mafai ona su’e uma ai tagata malaga o loo tauaveina ni aupega ma mea faapāpā malolosi e pei o ututau o laau malosi.
O le a su’e ai foi ato ma uta ina ia malupuipuia Samoa mai le faaono faaulufale faananā mai iai o ia vaega.
Faaalia e le ta’ita’i o le Malo i lana saunoaga o le agalelei o Niu Sila ua saga faamautū ai pea le galulue faatasi o malo e lua.
