E 16 tausaga o se teine talavou Samoa ua muta faafuase’i le mafutaga ma si ona aiga, ina ua fana e leoleo i le afiafi o le Aso Lua o le vaiaso lenei, i Anchorage i le setete o Alaska i Amerika.
O se vaaiga faamomoiloto o loo feavea’i solo ai i luga o le api o foliga le video o loo pueina ai le faatalanoaga a le tina lotomomoia ma si ana fanau teine a o latou tau faamatala le mea na tupu.
I se faamatalaga a le Anchorage Police Department o loo lipotia i le Alaska’s News Source, o lenei faalavelave na tupu i le tusa o le 11:30pm i le afiafi o le Aso Lua i Alaska, ina ua valaau ane se fesoasoani a leoleo mai se tamaitai na ia faamatala ane o loo lamatia lona ola i faamata’uga a lona uso (sister) ma o loo ia umia e lona uso se naifi (tulou).
Ina ua taunuu leoleo i le nofoaga, Greenbriar Apartments na amata ona tuu atu a latou faatonuga i le teine o loo tuua’ia peitai e lei usitai iai le teine ma pei e aga’i ane i leoleo o loo ia u’uina le naifi, e pei ona ta’ua i faamatalaga a le APD.
O si afafine ua maliu e 16 ona tausaga, o Easter Leafa lona igoa na faailoa ane e sui o lona aiga.
O loo faagasolo suesuega a le matagaluega i lenei faalavelave, ae i le ata video o loo i luga o le fb, o loo faamatala ai uso o le teine ua maliu, ina ua taunuu atu leoleo, e iai se isi uso o le teine sa taumafai ane i leoleo pe maua sona avanoa e na te talanoa atu ai i lona uso se’i faafilemu ae lei toe talia e leoleo se isi o latou e faasalavei ane, ae aga’i sa’o atu leoleo i le pito o loo tu ai le teine.
O Easter na ta’ua e nai ona uso, e lei leva tele ona malaga atu i Alaska e nofo ai ma lona aiga, mai Amerika Samoa, ma o lea o le a sauni mo ana a’oa’oga i lona junior year i le high school a o lea ua motusia faafuase’i le latou mafutaga.
I se faatalanoaga ma le aufaasalalau i le taeao o le Aso Lulu, na ta’ua ai e le leoleo sa faia le faatalanoaga, o se tasi o leoleo na ia fanaina Leafa e lē na o le faatasi le taimi ae tele, e faapena foi i le isi leoleo na ia fanaina i se “less lethal projectile”.
Na ave atu Easter i le falema’i ma o iinā na faailoa ai ua uma lona soifua.
O se faalavelave lenei ua lagalagā ai foi le tele o manatu o tagata e lē gata i lea lava setete ae o le lalolagi atoa a o feavea’i ai ata o lenei faalavelave i luga o auala o fesootaiga televavave, ua matuā fesiligia ai lava le faatinoga o galuega a leoleo ma le auala o loo tali atu ai i ni faafitauli faapenei, aemaise o lea sa valaau ane se tasi mo se fesoasoani e faaitiitia ai le faafitauli, e aunoa ma se faatalitalia o le auala lea o le a aga’i iai leoleo e fofo ai le faafitauli, o le faaoo o le oti i se tasi.
O loo ta’ua i lipoti o lenei faalavelave, o le faaono ai lea ona tulai mai faalavelave e aafia ai lava leoleo i lo latou faaaogāina o fana, i totonu o lenei aai o Anchorage i le tolu masina talu ai.
E toe iai se faaopoopoga o ni lipoti o lenei faalavelave, ae momoli ai foi faamaisega i si aiga faanoanoa i le tulai mai ai o lenei faalavelave i si o latou afafine.
