Ua tele talanoaga i le asō i se tasi o mataupu ua faailoa mai i luga o upega tafailagi ua talosagaina ai nisi e nonofo i se fasifanua e faaaoga ai se faleie poo si tamai fale ae o le totogi e $130 i le masina.
O le nofoaga lea e lata i Eagle Vale ma e manaomia ai foi ma se bond e $520 ma se vaegatupe e $260 mo le lua vaiaso muamua o le rent.
O lea faasilasilaga sa faaalu i luga o le maketi a le facebook ma ta’ua ai o lea nofoaga e lata i auala o femalagaa’iga lautele ma faleoloa.
Fai mai finagalo faaalia o tagata i luga o le upega tafailagi ua alagatatau i leoleo ona silasila i le mataupu pe o solia ai tulafono o tulaga tau mautotogi aemaise o le saogalemu ma le soifua maloloina o tagata o le a tali ane i lea faasalalauga.
Ua faaalia foi e nisi e le o iai se afaina i le mataupu lea auā ua matuai manaomia e tagata se faamama avega i tulaga i totogi o fale ma e le o taugata le rent 130 i le masina ae o le popolega o se falelēta’ua tulou ma se nofoaga e faamālū ai aemaise foi o lea o le a oo mai le taumalulu.
