E fā tausaga o le a faasoa mai ai e le polokalame o taaloga a le malo o Ausetalia mo le Pasefika le Pacific Ausports, lana fesoasoani tupe e tasi tesimale fā miliona tala Samoa poo le 800 afe tala tupe Ausetalia, i le fuafuaga e atina’e ai le aulakapi ta’ito’afitu a tamaitai le Manusina.
O le faafetai lea a le Ofisa Sili o le Lakapi Samoa, le tofa Seumanu Douglas Ngau Chun i le malo o Ausetalia e pei ona avea lona Komesina Maualuga i Samoa na te faamautū lea fesoasoani.
Faaalia e le Ofisa Sili o se agalelei o le a una’ia ai i se tulaga maualuga le taumafai atu o le Manusina e ofi i le taamilosaga a le lalolagi i le lakapi ta’ito’afitu le HSBC World Series, aemaise o le taumafai atu o le au ta’ito’afitu a le Manu Samoa ia toe ofi i lea taamilosaga.
Faaalia e le Komesina Maualuga o Ausetalia i Samoa le susuga Will Robinson o le fesoasoani a lona malo o se faailoga vaaia lea o le galulue faatasi o le malo o Ausetalia ma le malo o Samoa i le atina’eina o taaloga o le avefu’a mo atunuu e lua aemaise o le Pasefika.
I le pitolaau a le pulega o le lakapi a Ausetalia ua faailoa foi le lagolago mai i le Lakapi Samoa ina ia ausia e alo ma fanau a Samoa se tulaga maualuga i le taaloga lakapi.
