E to’alua tulisi poo tagata tafafao maimoa ane i Zambia ua maliliu a o iai i se tasi o paka i lea atunuu na osofa’ia ai e se meaola o le elefane.
Fai mai le 9News o tulisi o ni tinā matutua e to’alua sa savalia le paka lea ma e 67 ma le 68 tausaga le matutua.
O le isi e mai le UK a o le isi e mai Niu Sila.
Ua ta’ua i le lipoti o i latou sa vaavaaia lea tafaoga poo le matamataga i le paka sa taumafai ane e taofi le meaola e ala i le tafanaina ma e ui na manu’a ai le elefane peita’i ua aafia lava soifua o nai tinā ia ma maliliu ai e pei ona ta’ua e leoleo.
O le itu i Sasa’e o Zambia na tupu ai le faalavelave i le South Luangwa National Park pe ā ma le 600km mai le laumua o Lusaka.
O loo faia le su’esu’ega i lenei faalavelave ae ua ta’ua o le isi faalavelave faapea na tupu i le tausaga talu ai na fasiotia ai foi ni tulisi Amerika se to’alua ma o ni tagata matutua foi.
Puna o Faamatalaga: https://www.9news.com.au/world/elephant-kills-2-female-tourists-from-the-uk-and-new-zealand-in-zambian-national-park/36421608-27c1-4008-9708-13405c4f1bca
