Fai mai ua tusi ane le ta’ita’i o Venezuela o Nicolas Maduro i le Peresetene o Amerika o Donald Trump i le mae’a ona osofa’ia e Amerika o vaa o loo masalomia o loo feavea’i ai fualaau faasāina, ma ua ofo ane foi Maduro i le faia o ni talanoaga ma le sui o Amerika o Richard Grenell.
I le tusi a Maduro ua faailoa ai e le sui Peresetene o le atunuu o Delcy Rodriguez ma faamaonia ane i le CNN, o loo teena ai e Maduro lona auai i le feavea’iina o fualaau faasāina ma ua ia ta’ua foi o tala taufaasese, fake news ia o loo salalau ma ta’ua ai lona igoa.
E to’a 11 tagata Venezuela na fasiotia ai i le osofa’iga lea a Amerika aemaise ai isi foi tagata na fasiotia i le isi osofa’iga i le vaiaso na te’a nei.
Fai mai Trump ina ua fesiligia e tusitala, o le a vaai lava poo le ā le mea o le a tupu ia Venezuela.
O loo tuua’ia e le faigāmalo a Trump, o le tagata lea o Maduro o loo galulue faatasi ma le cartels e la’u ane fualaau faasāina i Amerika ma ua oo i le 50 miliona le tupe ua ofo e Amerika mo le pu’eina o Maduro.
Puna o Faamatalaga: https://edition.cnn.com/2025/09/21/americas/maduro-letter-trump-venezuela-intl-latam
