O loo faatalitali patī faaupufai sa tausinio i le faigā filifiliga aoao a Samoa i le faitauga aloa’ia ua faagasolo, lea o le a faitau ai palota faapitoa ma palota muamua ma maua tonu ai le aofa’iga o palota e maua e sui tauva e 187 sa faia iai le filifiliga.
I le mātau atu i faamaumauga a le ofisa o faigāpalota talu mai le Aso Faraile ma le Aso Toonai sa faailoa ai aofa’iga o palota a sui tauva, e valu itumalo o loo felata’i palota a le sui o loo tulaga muamua ma le sui o loo tulaga lua.
O lea felata’i o numela e amata mai i le 2 palota, 15, 31, 28, 38, 49, 42, ma le 27 palota.
O itumalo e pei o Falealili 2, Safata 2, Siumu, Anoamaa 1, Faleata 1, Palauli 2, Gagaifomauga 2, ma Faasaleleaga 2 o loo iai le tulaga lea i le aofa’iga o palota a sui tauva i le tulaga muamua ma le lua.
I le mae’a ona faavasega ai o pepa palota faapitoa i itumalo palota e 50 ua faailoa ai e le ofisa o le komisi o faigāpalota le aofa’iga o palota faapitoa ma itumalo ta’itasi e ave tonu iai.
O loo maualuga ai palota faapitoa mo le itumalo o Vaimauga 3 e 362 pito iai Faleata 1 e 329.
O Vaimauga 1 e 261 Vaimauga 4 e 212 a o Sagaga 1 e 197.
O isi itumalo e 160 ma ona tupu faasolo ane ai i le 90 ma lalo ifo lea e pito maualalo le numela o palota faapitoa mo le itumalo palota o Falealupo e 45.
O le itumalo o Faleata 1 e pito tele le numela o palota muamua e le’i faitauina e 314, Faleata 4 e 227 ma Sagaga 2 e 229.
O isi itumalo e 200 faasolo ane i le silia i le selau se’ia oo i itumalo e 50 ma lalo ifo le aofa’i o palota muamua.
O ia uma palota pe a mae’a ona faitau i le faitauga aloa’ia ua faagasolo i lenei vaiaso se’ia oo i le Aso Faraile o le a mautū ai le aofa’i o palota ua maua e sui tauva uma aemaise lava ia i latou o loo felāta’i numela o palota sa latou maua.
I faamaumauga e le’i aloa’ia pe a fua i le numela o nofoa mo pati faaupufai ua manuia sui tauva, Faatuatua i le Atua Samoa ua Tasi e 33, vaega e puipuia aiā tatau a tagata e 12, Samoa ua Potopoto e 3 ma le 3 o nofoa mo sui sa tauva faatuto’atasi.
E ono iai se suiga o ia fuainumela i le mae’a o le faitauga aloa’ia.
