O le a manino i le mae’a ai o le faitauga aloa’ia o le faai’uga o le palota tele a le atunuu i le Aso Faraile ua mavae, le aofa’iga o sui tauva tama’ita’i ua manumālō mai i nofoa o itumalo faapalota e 51.
Talu mai le faai’uga muamua o le palota e oo mai i le taimi nei, e to’alima lava sui tauva tama’ita’i na manumālō e aofia ai le nofoa o le itumalo o Lotofaga, itumalo o Aana Alofi 4, itumalo o Safata 1, itumalo o Falealupo, ma le itumalo o Palauli 1.
Afai ae mae’a le faitauga aloa’ia i le faai’uga o lenei vaiaso ae leai se suiga o le aofa’iga e to’alima o sui tauva tama’ita’i ua manumālō mai i le faigāpalota, o le itu mautinoa o le a faaaogā loa e le Komesina o faigāpalota le aiaiga o le 10 pasene e sa’ili mai ai se sui tauva tama’ita’i e ausia e le aofa’iga o ana palota le 10 pasene e faaatoa ai le ono o nofoa o sui faipule tama’ita’i i le paeaiga fou a le Palemene.
Peita’i o le a faato’ā sa’ili lea tulaga pe a mae’a ni palota laiti e māfua mai i ni faai’uga a le faamasinoga i ni tagi o moliaga o faatosina solitulafono.
Ua māfua ona taatia lea galuega se’i mae’a ni palota laiti e toe faia, ona o le faai’uga a le Faamasinoga o Talosaga na toe iloilo ai le faai’uga a le Faamasinoga Maualuga i le finauga a patī faaupufai o le Faatuatua i le Atua Samoa ua Tasi ma le vaega e puipuia aiā tatau a tagata i le mae’a o le faigāpalota tele i le tausaga e 2021.
Na oo lea finauga i le faamasinoga ona o le faauigaina o le aiaiga o le 10 pasene lea na finau le vaega e puipuia aiā tatau a tagata e to’aono tama’ita’i, ae finau le Faatuatua i le Atua Samoa ua Tasi e to’alima.
O lea ua manino mai lea finauga faaletulafono e ono nofoa o tama’ita’i i le Palemene o Samoa i le aiaiga o le 10 pasene.
Sa faia teuteuga o lea aiaiga i le paeaiga 17 a le Palemene peita’i o loo muta le faatalanoaina o ia teuteuga i le faitauga faalua o le tulafono tau faaofi na tuuina atu e le faigāmalo talu ai, ma e iai le talitonuga o le a toe tagofia e le paeaiga fou lona 18 a le Palemene.
O lea ua faailoa i le faitauga aloa’ia le faamautūina o le filifilia o sui tauva tama’ita’i e to’alima mai le faigā filifiliga ua mae’a a Samoa.
O le afioga Fiame Naomi Mataafa ua toe tusi aao iai lona itumalo o Lotofaga ma o le ta’ita’i o le patī faaupufai o le Samoa ua Potopoto na ia maua palota e 486.
O le tasi o sui tauva tama’ita’i le afioga Mulipola Anarosa Ale Molioo sa tauva i le fu’a a le Faatuatua i le Atua Samoa ua Tasi ua toe manumālō i le nofoa o le itumalo o Palauli 1, na ia maua palota e 725.
O le sui tauva tama’ita’i le afioga Afamasaga Leone Mati Va’ili Masame ua tula’i i le nofoa o le itumalo o Aana Alofi 4 na ia maua palota e 848.
O le sui tauva tama’ita’i le afioga Seve Te’i Fuimaono ua manumālō i le filifiliga a le itumalo o Safata 1 na ia maua palota e 949, ma le sui tauva tama’ita’i le afioga A’eau Tima Le’avaiseeta ua manumālō i le nofoa o le itumalo o Falealupo na ia maua palota e 397.
