Ua faaauau pea ona faailoa le le fiafia o tagata, e lē gata i aveloli, autietie uila ma le aufaitaavale i omoomo o le tele o auala i le atunuu.

I se lipoti i le asō i le televise a Niu Sila ua ta’ua ai molimau a nisi o le aufaitaavale ua faaleagaina taavale ona o faaletonu ia i le alatele aemaise i le state highway 1 e oo atu i le 100km i le itula le saosaoa e mafai ona malaga ai. 

Ta’ua e le aufaitaavale e lē o iai ma ni faailo poo se tulaga e iloa ai e le avetaavale o lea vaega o le auala o loo faaleagaina.

E lē na o se toatasi se avetaavale ua faailoa finagalo i lenei mataupu ma ua valaau ai i le malo ia faia se fuafuaga i nei faaletonu. 

E faamatala e isi nisi o auala o se tulaga lē manuia ma ua tele foi taimi ua valaau ai mo se fesoasoani i lea vaega ae foliga mai e lē o faia lava iai se faiga fou.