O le afiafi o le Aso Lua o lenei vaiaso na faataunuuina ai le ‘aiga ae o se faatasiga tele a sui uma o le Pacific2Nations.
O se faatasiga e lē gata ina patipatia ai le galuega fitā o loo faatino pea e le laulauafono a lenei faalapotopotoga, ae o se potopotoga na aumai faatasi ai tagata mai itu e fia o lenei atunuu, o nisi mai Samoa ina ia saga faatumauina le latou mau ma le mauaa o lo latou faatuatua i le galuega faamisiona a le Alii o Iesu Keriso.
E silia ma le 400 tagata na omai faatasi le to’atele o tagata Pasefika, e aofia ai ma nisi o sui taualoa o lenei atunuu, o ē sa iloga i taaloga lakapi, o tagata faipisinisi, o faipule ae o auauna a le Atua mai lea fata faitaulaga ma lea fata faitaulaga o ē ua loa tausaga o galulue e faaauau pea lenei faamoemoe ola.
O se faamoemoe faamisiona ua au tausagā o faatino mai, peita’i o le fofoa mai o le Pacific2Nations na amata i le 13 tausaga talu ai i le tausaga 2012, i se fetufa’iga a auauna a le Atua poo faife’au Pasefika i Aukilani nei ma le Pasefika ina ia aumai faatasi o tatou tagata Pasefika e aga’i e faasoa atu le alofa o Iesu Keriso e ala i malaga faamisiona i atunuu eseese o le lalolagi.
O le afioga ia Savae Sir Michael Jones na faatinoina saunoaga autū o le faamoemoe, ma sa ia faamalosi ai i le lautele i le moomia ai ona tutula’i ma aga’i e faatino ‘aua le nofoa’i.
O se faasoa na aga’i tonu lea i augātupulaga faia’e ina ia faaauau atu le galuega tala’i o le talalelei; a ia ‘aua ne’i uma ai ia i latou a ia faatino ia maua ai nisi agaga mo le Alii.
Sa maua foi le avanoa e faasoa ai le susuga i le faife’au ia Lui Ponifasio, o lē na ta’imua i le taumafai ai ma nisi o faafeagaiga ma faife’au e tuufaatasi le Pacific2Nations.
I lana saunoaga sa folasia ai e le susuga i le faife’au le talafaasolopito o le liliu ai o tagata Pasefika e avea ma Kerisiano, a o avefe’au a le Alii i galuega faamisinoare.
Sa ia faailo ai le pa’ū maualalo ai o numera o tagata Pasefika o loo toe faatinoina lenei galuega faamisiona.
Ma o se galuega o loo taumafai pea e toe faaolaola; e pei ona fanauina ai loa lenei sāvali a o se faalapotopotoga o le Pacific2Nations.
O le valaau a le alii faife’au, ua moomia ni avefe’au – o tagata galulue mo le misiona a Iesu (labourers) e pei ona ia faamalosi ai i le to’atele.
Na ia faamanino foi e lē na o faife’au o loo valaau iai le P2N ae o soo se tasi lava, o faipisinisi, o faia’oga, o tagata taaalo, o foma’i, o tagata su’etusi ma tagata talenia uma e auai i le valaau.
E faaaogā uma e le Alii tagata ma o le faamoemoe ina ia saga faapupula le tulaga e aogā uma tagata ma o lou agavaa o le a faamanuiaina ai se isi e le’i silafia lava le talalelei a Iesu Keriso.
I le mae’a ai foi o le saunoaga o le afiafi, o lea na faatino ai loa ma se tasi o vaega.
O le faatautu’i o ni oloa sa ofoina atu mo lea faamoemoe tāua, auā le fesoasoani ai mo galuega faatino a le faalapotopotoga ina ia mafai ona faatino misiona.
Na mafai ona faatino lenei faatasiga tele i le Eden Park, ma o le faanaunauta’iga a le P2N ma ona sui uma, ina ia mafai ona faatumulia le malae taalo lakapi tele lea i se taimi o i luma e tagata ua omai faatasi e vivii le Silisili Ese.
