Ua valaau e leoleo molimau e 13 e tutulaʻi i le faamasinoga e molimau ina ia faamaonia moliaga e lima faasaga i le tamaitai tusitala tusisolo ia Papalii Sia Figiel, o Vaivase Uta.
O ia molimau e aofia ai leoleo, o se alii foma’i faapitoa na faia le ta’otoga o lē ua maliu, o se tama’ita’i foma’i atoa ai ma se tasi o le aiga o lē ua maliu.
O loo molia Papalii i moliaga o le fasioti tagata faamoemoeina, fasioti tagata paʻivalea, o le faaoo manu’aga tugā, ma le lua moliaga o le faa’au’upegaina i ‘au’upega mata’utia e iai se samala ma se agaese.
O le itu a leoleo o loo tulai ai le Tamaitaʻi loia ia Taimalelagi Leinafo Taimalelagi Strickland ae o le itu a lē ua molia o loo tula’i ai Unasa Iuni Sapolu.
O lē ua maliu o se tama’itaʻi e maualuga lona atamai i a’oa’oga e 78 tausaga le matua ia Dr Caroline Sinavaiana Gabbard mai Siusega ma Utulei i Amerika Samoa.
I le folasaga a leoleo i le taeao analeila na faailoa ai e le tama’itaʻi loia o tula’i mo le itu a leoleo, o faamaumauga a leoleo i la latou suʻesuʻega o loo maua ai o le Aso Faraile 24 o Me 2024 na tuua ai e lē ua maliu lona fale i Siusega e feiloa’i ma lē ua molia i lona fale i Vaivase Uta.
O le taimi lea na tupu ai le faalavelave ina ua faaoolima matuiā lē ua molia i lē ua maliu ma maliu ai lava i lona fale i Vaivase.
Ina ua mae’a le gaioiga a lē ua molia ona ia tuua lea o lona fale ae aga’i atu i Vavau Beach Fales e faaaogā ai le taavale RAV 4 # plate 32944 a lē ua maliu.
Sa tōfā lē ua molia i Vavau malama le taeao na sosoo ai i le aso 25 o Me 2024, ona malaga lea o lē ua molia i se tasi o lona tauaiga i Lotofaga ma tōfā ai foi i lea po.
O le taeao o le Aso Sa 26 o Me 2024 na faato’ā faailoa ai loa e lē ua molia i lona tauaiga le faalavelave ua tupu e aofia ai lana gaioiga ua manu’a ai lē maliu ma o loo iai lava le tino maliu o le tinā sa ia faaoo iai le maliu i totonu o lona fale i Vaivase Uta.
O le taimi loa lea na logoina ai loa e lona tauaiga leoleo.
Sa aga’i leoleo i le fale o lē ua molia i Vaivase e sa’ili le tino o lē ua maliu.
O totonu lava o le fale lea i se tasi o faletā’ele na maua iai le tino maliu o le tinā ia Caroline.
Na faailoa e le itu a leoleo e taunuu atu leoleo ua pupuni le faitoto’a o le faletā’ele i se taga lapisi lanu uliuli ma faamauina i ni fao sa faapea foi ona una’i iai se kapoti laupapa umī ina ia aua ne’i iloa atu le faitoto’a.
Ua faailoa e leoleo o totonu o le faletā’ele lea na maua ai le tino o lē ua maliu ae e lē mamao mai i fafo mai o le faletā’ele o loo taatia ai le agaese ma le samala o loo masalomia na faaoo ai e lē ua molia le oti i lē ua maliu.
Ina ua foi leoleo i le ofisa ma faia ai loa moliaga ma taofia ai lē ua molia nei i le fasioti tagata faamoemoeina.
Molimau 1
O le molimau muamua na valaau e le itu a leoleo o le alii taai lua ia Peter Fuimaono mai le vaega o le Forensic. Ua 14 tausaga o avea ma leoleo ae 4 tausaga talu ona faigaluega i le vaega o le Forensic i le Matāgaluega o Leoleo. O ia lea sa ia puʻeina ma tuufaatasia ni tusi ata (photo booklets) se tolu.
O le tusi o ata o le nofoaga na tupu ai le faalavelave (crime scene) e 18 ata o loo iai. O le tusi o ata o lē ua maliu ina ua auina atu i le falemaliu i le falema’i e 17 ata o loo iai, ma le tusi o ata o le taavale a lē ua maliu e 22 ata o loo iai.
Molimau 2
O le molimau a le alii o Mitaʻi Liliau 39 tausaga mai Vavau o loo faigaluega nei i le Saletoga Beach Resort i le taimi nei na ia faailoa ai, na oo atu lē ua molia a o faigaluega i lea taimi i le Vavau Beach Fales poo le lata i le 6 i le afiafi o le aso 24 o Me 2024. O loo la’eiina le ofu lanu mūmū ma le ofuvae lanu uliuli.
Sa faapea atu o ia e fia moe i se faleoo o fale o loo i luga o le matāfaga ae sa faailoa iai e lē faatagaina peita’i sa faatauanau atu lava ma vili ai loa le matai o loo vaaia le atina’e o beach fales a le afio’aga o Vavau, ia Lasalosi poo Malologa ma tuuina atu ai loa le faatagaga.
O le faatagaga lea sa faatonuina ai loa foʻi ina ia moe ai ma ia i se isi faleoo i lea po. Sa faailoa e Mitaʻi poo le lata i le 5 i le vaveao o le aso na sosoo ai na ala ane ai ua leai lē ua molia mai le faleoo na moe ai.
Sa tula’i loa ma suʻe e ao ifo lava o suʻe i tulagavae i luga o le oneone, o lea taimi na ia logoina ai loa Malologa ma sa aga’i loa foi le sa’iliga ae tau atu i tamaiti ma a latou ta’ifau ona faaaogā lea o ta’ifau e sa’ili ai lē ua molia ma maua atu ai lē ua molia o loo taoto i le togavao i luga o maa e ufiufi ona mata i laupapata.
Sa tauanau e Malologa ma toe aga’i ane ai loa i le mea o iai faleoo.
Molimau 3
O Malologa poo Lasalosi lea o se matai Vavau 57 tausaga o le soifu, o ia e vaaia le atina’e a le afio’aga na ia faailoa i le Faamasinoga, ina ua ia fesiligia lē ua molia pe o fea sona afio’aga ae tali mai o ia e sau mai fafo ma e nofo i se faletalimalo i Apia.
Sa ia faailoa na ia fesiligia foʻi le ua molia pe aisea ua lē alu ai ae faapea mai o loo pe lana taavale, na faailoa e Malologa na savali loa i le taavale ma faaola ola mai ma fai loa i lē ua molia e alu loa o loo ola lana taavale.
Sa ia faailoa foi i le faamasinoga o lana vaai i lea taimi i lē ua molia e pei e iai se mea e mamafa i lona mafaufau.
O le taimi lona lua na ia toe vaai ai i lē ua molia ina ua toe o atu ma leoleo i le Aso Gafua 27 o Me i Vavau Baech Fales e suʻe mai lana ato e faapea na tia’i ai i le matāfaga. Na faailoa e Malologa i le faamasinoga na toe maua le ato ma na omai ma leoleo ma lē ua molia.
Molimau 4
O le molimau mulimuli a o le’i maeʻa mo le asō le Faamasinoga o le tausoga o lē ua maliu ia Goretti Wulf mai Vaovai Falealili ma o ia o le Health Coordinator o le Koluse Mumu i Samoa.
Na ia faamatala i le faamasinoga o Caroline sa nofo i lona fale rent i Siusega ma e iai lana teine faigaluega. E ui e le’i tele sa la mafutaga ma lona tausoga ae sa iai lava taimi na la feiloa’i ai.
O le la feiloa’iga mulimuli ma lē ua maliu o le aso 17 o Me, 2024 i le vaiaso ua mae’a le Aso o Tinā.
Na ia faailoa na te le’i iloa se mea ua tupu ae o le Aso Gafua 27 o Me na usu mai e faigaluega ae vili atu le teine faigaluega a lē ua maliu ma fesili atu ia te ia pe sa la toe talanoa ma Caroline ona ua fiu e vili.
Sa faapea atu foi e le’i oo atu lē ua maliu i le fale i Siusega ona o le mea lava le la sa iai le fale e le’i toe alu atu iai. E oo foi i ana ta’ifau e le’i fafagaina.
Na faailoa e Goretti sa ia vili i le falemaʻi e sa’ili sa vili i le outpatient pe na iai se faalavelave tau taavale pe na avatu ai se tasi e suafa ia Caroline peita’i e leai.
Sa vili loa i le ofisa o leoleo ma ia manatua ai lona nephew e leoleo ma la tau sa’ili loa. Sa toe vili pea ma tali atu ai loa le sui komesina o leoleo ma faapea atu e sili pe a la omai i le ofisa e iai le matāupu e fia talanoa mai ai.
A o le’i o i le ofisa sa o muamua i le fale o lē ua maliu i Siusega ma mautinoa ai e leai ma se mea o le fale na lotea pe na solia foi, sa foi i le ofisa o leoleo ma faapea mai ai loa ua leva ona tau sa’ili se aiga o lē ua maliu ma talosaga atu ai loa pe mafai ona aga’i i le falemaliu e tagai ma identify lē ua maliu poo ia moni lea.
Sa vaaia i le faamasinoga le mafatia o le tinā o Goretti ina ua faamatala mai lana molimau le taimi na ia vaai ai i lona tausoga o taoto mai. E mata’utia vaaiga na ia vaai iai.
O le a faaauau le faamasinoga i le asō i molimau a le itu a leoleo i lenei matāupu.
