Ua faasilasila e le ta’ita’i o le NZ First, Vaovasamanaia Winston Peters se faiga faavae fou poo se policy o le a faatulaga e tatau ona sainia ai e soo se tagata e fia malaga mai e nofo i totonu o Niu Sila.
Na saunoa Peters, e pei ona faasalalau i luga o le New Zealand Herald, i se latou feiloa’iga faaletausaga ma o le matāupu lea o le a taula’i iai a latou campaign mo le palota o le 2026, e tāpā ai tagata uma e fia autovaa mai e nonofo i Niu Sila, ina ia saini muamua se maliega e latou te folafola ai, o le a latou usita’ia ma faaaloalogia le atunuu o Niu Sila, o le a latou faaaloalo i tagata uma o le atunuu e aofia ai tu ma aganuu a Niu Sila, o ana agatausili ma ia faaloalo i le fu’a a le atunuu.
Fai mai Peters, afai e te lē talia ma lē fia sainia na tuutuuga mo le nofo ai i totonu o Niu Sila, e faigofie lava la le tali, aua ne’i e tuvae mai i Niu Sila.
Sa ia faaaogā mai le suiga ua iai nisi atunuu, e pei o Amerika, Peretania, Siamani, Aialani aemaise foi lo tatou atunuu tuaoi o Ausetalia, ua matuā tele aafiaga lē lelei, o faafitauli ua oo iai ma suiga e tele ua iai i nei aganuu ona o aafiaga mai tagata o isi aganuu ua nonofo ma aumau ai, ua aumaia ai āuga leaga e pei o uiga faailogatagata ma le faatautee i faigāmalo, o suiga i agafesoota’i ma suia ai foliga o mea i totonu o aai i le atunuu.
Ma ua faamamafa ai nei i le saunoaga a Peters, pe a amata le campaign a le New Zealand First i le faigāpalota o le tausaga fou, o le a latou uuna’ia ina ia mua’i saini e tagata uma lava e fia malaga mai e nonofo ma avea Niu Sila ma o latou atunuu, le Kiwi Values document, e ioeina ai o le a latou usita’ia tulafono uma a lo tatou atunuu, o a tatou agatausili ma tu ma aganuu; a leai, aua ne’i ulufale mai i Niu Sila.
Puna o Faamatalaga: https://www.nzherald.co.nz/nz/politics/nz-first-leader-winston-peters-to-speak-at-public-meeting/JRQEWJWFQJAG3DJLLFGC2NXUEY/
