Ua salalau ai i luga o upega tafa’ilagi le social media, ata poo se video, o loo faaali manino mai ai tu ma aga a le sui o le Kapeneta ia Chris Bishop na faatino i le tufaga faailoga mo tagata pepese o Aotearoa. 

I le ata na faaalia ai le faia o ni lafoga lē tautamalii a Bishop faatatau ia i latou na faafiafia, i le faalealea ai ia le fu’a poo le tagavai a tagata Maori e faailoa ai le tutū faatasi i taimi faigata, ae ua faaalia ai uiga lē migao o Bishop, ma faapea atu, ‘e leai ma se mo’i o na faaaliga o loo faatino mai’, o se faamatalaga lena e tau latalata atu i le faaupuga na lafo e le alii minisita, i lona faaperetania – “what a load of crap”.

Ona o ia faamatalaga na faliu ae loa le tasi o tagata pese e suafa ia Don McGlashan, ma ia fai atu ia Chris Bishop e sili lona mālōlō e leai sana fe’au i le aufaafiafia. 

Na fai lava sina umi o felafoa’i faaupuga a Bishop ma le tagata pese, ae na ta’ua e Don e le’i iai sona manatu o le Minisita lea na faia faaupuga lē logo mālie ae o le faaumiumi ona fai atu ia te ia o lea tagata na ia iloa ai o le Minisita lea o loo la fetaua’i. 

Na ta’ua e se isi tagata na iai i lea afiafi, e faasuā’avā Chris Bishop, ma ua faaalia ai lona faanoanoa tele ona e lē o ni aga ia a se tagata ua ave iai le faaeaea a le atunuu e avea ma se tasi o ta’ita’i o le malo aemaise o se tagata e maulaga sona tulaga i le atunuu. 

O loo teena e le Minisita sa ia faia nei faaupuga e faatatau i tagata Maori, ma ua ia tuua’ia tagata i lo latou taumafai e faaleaga lona igoa ma lona tofiga.

Puna o Faamatalaga: https://www.rnz.co.nz/news/national/562700/what-a-load-of-crap-chris-bishop-caught-ranting-during-stan-walker-s-aotearoa-music-awards-performance