O pu’egā selfie ma ata o se tasi tama’ita’i sa avea muamua ma pule i se faleoloa e faatau ai jewellery poo filifili ma mea ‘ila’ila ma taugatā, ua i’u ina iloa ai lona gaoia o ia oloa ma ua tuli ai nei lona faasalaga i le falepuipui.
Faailoa e le CNN o le tama’ita’i o Lucy Roberts na ia tapu’e ona ata ma lafo i le latou aufaigaluega, ata o loo ia laeiina ai meatotino sa ia gaoia mai i le pisinisi sa faigaluega ai.
Fai mai le lipoti o le taimi na faamavae ai Lucy ma alu mo sana tafaoga na maitauina ai e le aufaigaluega le tulaga ua oo i ana oloa.
Fai mai leoleo e le’i iai ma se popole o lea tama’ita’i i lana gaioiga na faia, ae na vaaia i ana selfies ia e tapu’e ma lafo ane i le aufaigaluega, le anoano o taimane o loo faailoa ane ai.
Sa faia le su’esu’ega ma maua ai e leoleo le faitau afe o pauni o le tau o ia oloa na maua i le fale o lea tama’ita’i.
A tuufaatasi le aofa’i e silia ma le $170 afe le tau o oloa auro, taimane ma isi sa faamauina mai ia oloa.
E lē o fia faia ane se tala a ana loia i le ‘autusitala peita’i o le faamatalaga a Lucy na fai i leoleo e faapea sa ia faanoi mo le faaaogāina o ia oloa mai se tasi la te faigaluega faatasi ae lē taumate sa tuuina e le aufaigaluega isi mau oloa ia i ana ato.
E ui i lea i le i’uga o le matāupu ua lipotia ua ia ioe i moliaga o le gaoi a o avea ma tagata faigaluega ma e oo i le 28 masina i le falepuipui lona faasalaga i le United Kingdom.
Puna o Faamatalaga: https://edition.cnn.com/2025/06/25/world/uk-lucy-roberts-jewelry-theft-sentence-intl-latam
