E lata i le ‘afa miliona poo se aofa’iga e 457 afe 896 tālā Samoa le tau na faatupe ai i se fesoasoani a le malo o Iapani le galuega o le suavai mamā mo le itumalo o Satupaitea.
O se galuega ua mafai ai nei ona maua e tagata o loo faamautū i Satupaitea le suavai mamā e saogalemu mo le faaaogāina, ma o se fesoasoani sa lagolago ai le faalapotopotoga o suavai tuma’oti a Samoa i le talosagaina o le polokalame fesoasoani a Iapani i le tausaga na te’a nei 2024 ina ia faatupe ai lea galuega.
E fā afio’aga o lea itumalo o loo maua le suāvai mai lea galuega e aofia ai ma le suāvai mo le falema’i faaitumalo i Satupaitea, lea sa umusa ma tatala i le Aso Faraile ua mavae le faaopoopoga o lea falema’i ma umusa ai ma le maota fou e faamautū ai le foma’i o loo galue ai.
O le galuega o lea maota ma le faaopoopoga o le falema’i faaitumalo o Satupaitea sa faatupe e lo tatou malo.
