O fautuaga a le Matāgaluega o le soifua mālōlōina ua faavae ai nei se faai’uga e toe a’e uma a’oga i le atunuu i le Aso Gafua o le vaiaso fou, le aso muamua o Setema i le tuana’i ai o ni vaiaso o taofia a’oga mai lava i a’oga faata’ita’i, a’oga tulagalua, o kolisi mauauluga ma Iunivesite ona o le pepesi o le faama’i fiva o ponaivi lea ua faamauina e to’aono fanau i Samoa ua maliliu ai.

O le Aso Faraile na te’a nei na faailoa ai e le tama’ita’i Palemia o le malo tausi lea faai’uga, a o faaauau ai pea galuega o le puipuiga o le atunuu mai lea faama’i.

Talu mai le lua vaiaso talu ai ua faamauina le oo atu i le 9,571 tagata i Samoa ua faamaonia le maua i āuga o le fiva o ponaivi e aofia ai gasegase fou e 1,601.

O lea aofa’iga e pei ona faailoa e le soifua mālōlōina ua aofia ai le 218 o gasegase sa taofia i le falema’i lea o loo taofia pea le 50 ma le to’atasi o loo taofia i le potu mo gasegase tigāina.