Ua mae’a ona afea e vaega faaupufai o le Faatuatua i le Atua Samoa ua Tasi ma le vaega e puipuia aiā tatau a tagata, eleele o le itumalo o Falelatai ma Samatau mo faalauiloa o faatosina o le palota a ia pati faaupufai, ae o le Aso Lulu o le vaiaso nei o taeao lea i Samoa, o le a afea ai lea itumalo i le faalauiloa a le vaega faaupufai o le Samoa ua Potopoto.
E pei ona silafia sa lē mautonu tapenaga o le faalauiloa a lea vaega faaupufai i totonu o Falelatai ona o se tapu e ala i le finagalo poo le afioga tutasi a le Falefitu o le Aiga Taua’ana lea sa faasā ai soo se laupapa faailoilo ma faalauiloa a patī faaupufai ma latou sui tauva ae lē aofia ai le patī faaupufai e puipuia aiā tatau a tagata.
Ua faailoa i le upega tafa’ilagi a le Samoa ua Potopoto o le ‘afa o le lua i le aoauli o le Aso Lulu nei e faia ai i le afioaga o Si’ufaga i Falelatai le latou faalauiloa.
O se faailo lea o le tafa o se finagalo o le Falefitu o le Aiga Taua’ana e pei ona sa faailoa e se matai o le saofa’iga a le falefitu le afioga Nanai Faamanū Ivara i se talanoaga i le vaiaso ua mavae, ua latou talia le tuualalo a le afioga i le Tamaaiga i se avanoa e toe fetuuna’i ai le faai’uga na autasi iai.
O le faai’uga foi lea na māfua ai ona tusi atu le afioga i le Sa’ofaapito le afioga Fiame Naomi Mataafa i le Komesina o faigāpalota e silasila i le faai’uga poo ogatasi ma aiaiga o le tulafono faavae ma le tulafono o faigāpalota.
O le sui tauva o le Samoa ua Potopoto o le a tauva i le nofoa o Falelatai ma Samatau o le afioga Faalavaau Fasitau Ula.
O faalauiloa ma faatosina a vaega faaupufai o loo afea ai nuu ma afio’aga o itumalo faapalota e 51 o le tatou atunuu o loo faaauau pea, a o lumana’i ai le vaiaso fou e tapunia ai ia faalauiloa, e pei ona faatulaga e faamuta i le Aso Sa, 24 o Aokuso.
