E faitau piliona pauni o le a inivesi e le faigamalo a le United Kingdom ina ia sauniuni ai mo se taua pe afai ae tula’i mai aemaise i lenei vaitau o le mau faamata’u mai atunuu e pei o Lusia ma Saina, o se faamatalaga lea ua faia e le failautusi a le puipuiga a le UK i le BBC.
Fai mai ua taliaina e le faigamalo fautuaga e 62 ua faatulaga i le latou Strategic Defence Review poo le iloiloga sa talitalia mo se taimi umi, ma ua aofia ai ma le fausia o nisi o vaamaulu e 12 e faaa’upegaina i malosi’aga faaniukilia, e aofia ai ma nofoaga e 6 e gaosia ai meatau atoa ma le faaaogāina o le poto faaonaponei ma faiga faatekonolosi.
Fai mai le failautusi o le puipuiga a lea atunuu e mana’omia ona faasefulu ona malosi atu le ami a Peretania ina ia lavasa’ia ai le mau faamata’u e pei ona alia’e nei i le lalolagi.
O loo faailoa i le lipoti lea o Lusia lea o loo foliga o loo faauiga iai tapenaga ia a Peretania ona o le osofa’ia o Ukraine ua atagia ai e ono faaaogā pea e Lusia lona malosi e faataunuu ai ana moemitiga.
O loo faailoa foi i le lipoti o Saina le isi atunuu o loo fai foi ma lu’itau mo le UK aemaise i tulaga e faatatau i osofa’iga i luga o upega tafa’ilagi.
O le faamatalaga mai le vaega a le Conservatives e faatatau i gaioiga a le faigamalo ua ta’ua ai o le mea ua faia o le a siitia ai tupe alu a le atunuu ae o le matāupu foi ua ta’ua ai vaamaulu ma isi vaa mo le puipuiga o ni faamatalaga uma o ni mea tetele o le a tutupu ae itiiti tupe e faatino ai ma ua leva ona tatali.
Puna o Faamatalaga: https://www.bbc.com/news/articles/clyqzlzlln2o
