O ananafi aso 8 o Setema lea ua faamuta ai loa le sa’iliga lenei ua atoa le fā tausaga o faia pea e leoleo, e sa’ilia ai le tamā ia Tom Phillips ma si ana fanau e to’atolu lea na fesolasolata’i lava Phillips ma ave faatasi ai ma lana fanau.
E pei ona avatu i talafou ananafi, o feteena’iga i le va o leoleo ma lenei alii sa faaaogā ai laaumalosi, na i’u ai i le lavea ma faamanu’alia le ulu o se tasi o alii leoleo ina ua fana ane e Phillips ma faatopetope atu ai i le falema’i i Waikato, ae fana ai e leoleo le alii o Tom Phillips ma maliu ai.
Na maliu le tamā ae na avatu e leoleo lona atalii sa la to’alua i le taimi na maua ai, ma faatalanoa i le ofisa o leoleo, a o aga’i ai leoleo mo le sa’ilia o isi tamaiti e to’alua, le fanau teine a Phillips.
Mulimuli ane poo le ‘afa o le 4pm ananafi na toe sau a le isi lipoti a leoleo, ua maua si fanau lea e to’alua ma o loo saogalemu i la’ua; sa maua i se tasi o vaipanoa e mamao ese mo tolauapiga, pe tusa ma le 2 kilomita le mamao ese o le mea na maua iai teineiti mai le nofoaga lea na maliu ai lo latou tamā o Tom Phillips.
O le masina o Tesema i le 2021 na sosola ese ai lenei tamā ma lana fanau mai le latou faato’aga sa nonofo ai i Marokopa, ma i lena taimi sa ta’i 8, 7 ma le 5 tausaga le matutua o nai tamaiti, ae o lenei ua toe maua mai ae ua ta’i 12, 10 ma 9 o latou tausaga.
I se saunoaga mai le Komesina o leoleo, Richard Chambers, sa ia faafetaia ma faamalo i le galuega fitā na feagai ai ma leoleo auā o se matāupu na tula’i mai e ogaoga ma lamatia ai soifua i le taimi atoa.
Sa faafetaia foi e le Komesina le malu o le malo ua faamanu’alia i lenei faalavelave ma momoli iai moomooga ina ia toe faafoisia lona malosi e ui e umi se taimi lea o le a faataotolia ai.
Ae mo le taimi nei, ua talia e le faamasino o Justice Cull se talosaga a le tama’ita’i loia o Linda Clark o loo tula’i mo le aiga o Phillips, ina ia taofia tusitala, o le aufaasalalau, o leoleo ma le Oranga Tamariki, mai lo latou faasalalauina o nisi o faamatalaga au’ili’ili e fesoota’i atu i lenei matāupu.
Puna o Faamatalaga: https://www.rnz.co.nz/news/national/572468/timeline-of-the-day-tom-phillips-case-came-to-a-close
