E lua mafaufauga na faamamafaina e le Taʻitaʻi o le sauniga le alii Faifeau o le EFKS i Sasina, Susuga Panapa Fata Toʻo i le aso ananafi i le faatautoga o le Palemene lona 18 o Samoa.
O le alofa faale-Atua ma le tuu ese o sootaga faaletagata a ia faia le malo i le faamaoni ma le amiotonu.
E le’i tofu nofoa le mamalu o le atunuu na auai atu e molimauina le tauaofiaga muamua o le Palemene o Samoa i le mae’a ai o lana faigāpalota i le masina na mavae atu nei.
O le taʻitaʻi o le Sauniga ma le lauga faamanuia mo le Paeaiga lona 18 o le Palemene na malele mai ai le Atua e ala i lana auauna tofia mo lea taeao.
O le tala ua masani ai i le Tusi Paia i le faigauo a Tavita ma Ionatana, peita’i ua taliga e fialogo ma tino e maniti a o ulufale mai ai le finagalo o le Atua i le faaleo a le alii Faifeau i upu e faapea….”A talanoa loa ia Tavita ma Ionatana e talanoa i le faigauō, ae e iai foi upu a le atunuu…E uo uo foa…ae ala ona foa le uo ina ua e lē alofa i se faamaoni ae e te alofa i le taui. E ala ona maopoopo le faigauo lea a Tavita ma Ionatana ona e lē o se alofa faaletagata ae o le alofa faale-Atua AGAPE (in Greek, Godʻs Love).”
Na faailoa e le Faifeau o le alofa lea na tatala ai le ofu talaloa o Ionatana, ave le tao ma le fusi o le alofa lea na savalia ai e Ionatana lona tamā ma fesiligia i lona ita pea ia Tavita o le tagata e leai se agasala ae na ia faia le faaolataga mo Isaraelu.
Saunoa Rev Panapa, ua mana’omia le alofa lea faale-Atua o le alofa e lē na o upu ae o le loto, e lē gata ua osi le feagaiga ae ua tatala le ofu ua tatala mea uma o le faailoga o le alofa e lē uma.
O le alofa foʻi lea na sosofa ai e Ionatana lo la va ma lona tamā ae tu ia Tavita o loo faia le amiotonu.
Na faamanatu e le Ta’i’ta’i o le sauniga i le Palemene ma Samoa ina ia aua ne’i manumālō sootaga….”
Aua tatou te o e fai lo tatou malo ma o tatou sootaga faaletagata, o tatou sootaga faaleaiga.
Ua talepe e Ionatana i le va ma lona tamā Aisea? E mana’o e fai le amiotonu”.
E to’atele malo mai fafo o sui lagolago o le Vaega faaupufai ua tulaʻi ma Malo sa auai mai e molimauina le faatautoga.
Sa faamanuia le Ao o le Malo, Afioga Tuiaana Tuimalealiifano Vaaletoʻa Sualauvi II i le Palemene lona 18 o le atunuu, faapea le Palemia Fou ma le Kapeneta ae o le lauga a le Palemia lona 8 o Samoa Le Susuga Laaulialemalietoa Leauatea Polataivao Fosi Schmidt na ia faafetaia ai le Susuga Tuilaepa Lupesoliai Sailele Malielegaoi faapea Fiame Naomi Mataafa o taʻitaʻi ua mavae atu nei i lo la sao mo Samoa, ma ia talosaga mo se filemū o le atunuu.
