Ua fuafua le Kāinga Ora e faatau ese atu sona fale e sili ona taugatā, o le tau e talafeagai ma lenei fale e silia ma le $3 miliona le tau.
O le villa i le tuātusi 18 Trinity Street o loo i le faatausi’usi’uga o Ponsonby ma Herne Bay, o nisi na o pitonuu maumea i Aukilani, o loo tu lenei fale i se laufanua e 619 sikuea mita le telē ma o lona tau o loo faatulaga ai e $3.15 miliona.
Ta’ua e le pule sili o le Kāinga Ora o Matt Crockett, o le tupe e maua mai le faatauina atu o lenei fale, o le a faatupe ai mea e toe fia faaleleia o fale o le malo o loo iai i le taimi nei ma nisi fale fou e fausia.
Saunoa Crockett, e lē mafai ona taofiofi mamau ai lava i nei fale taugatā i pitonuu sili ona maumea o Aukilani, ae semanū pe a faatau atu nei fale, o le a mafai ai ona matou fausia nisi fale fou e tele pe toe faafou nisi fale o le malo i nofoaga o loo sili ona mana’omia ai ni fale.
O le ‘afa o fale o le malo, ua silia ma le 50 tausaga le leva o na fale, ma e tele ni tupe e faaalu ai i le toe faaleleia, ma e telē se mana’oga o ni mea ina ia matuā toe faatula’i mai i ni foliga lelei, ma o le tele o nei fale ua lē o toe maua uma ai mea o loo mana’omia poo mana’oga o tagata e nofoia nei fale.
O le villa lea na mua’i ta’ua ua 102 tausaga le leva o lenei villa ma e tele taimi ua moomia ai ona fai ma toe lipea.
Saunoa le Pule Sili, nai lo le faaauau ai pea ona toe faafou ma lipea, o lea ua taga’i nei le Kāinga Ora, e faatau ese atu, ae maua mai ai le tupe e fau ai nisi fale fou e fetaui le telē, ma talafeagai ma le soifua mālōlōina o tagata e nonofo ai, ma ia talafeagai foi nofoaga e fausia ai na fale fou.
Puna o Faamatalaga: https://www.rnz.co.nz/news/political/573426/kainga-ora-to-sell-its-most-valuable-state-house?cid=newsletter
