O le aso ananafi na toe iloilo ai le talosaga o le alii o Raymond Wahia Ratima i luma o le faamasinoga; o lana talosaga mo sona avanoa i le palola, peita’i na teena e le faamasinoga lana talosaga.
O le lona 16 ai lea o taimi o tuuina atu talosaga a le alii o Raymond i le faamasinoga ae teena lava.
O Raymond Wahia Ratima o loo falepuipui nei i lona fasiotia o tagata e to’afitu.
Mo le silafia, o lea matāupu na laualuga i le vaitaimi o le 1900 e pei ona ia fasiotia ai tagata o lona aiga i le tausaga e 1992.
O ē na maliliu e aofia ai lana fanau e to’atolu. O Piripi e 7 tausaga, o Barney e 5 tausaga le matua, ma Stacey e na o le 2 tausaga le matua.
O isi tagata e to’afā, o tagata o le aiga o lona to’alua poo ona in-laws.
O le alii o Philip Ferguson Jnr e 14 tausaga le matua, o le tama’ita’i o Nicola Ferguson e 20 tausaga le matua, ma e faamaonia sa ia tauaveina se pepe pe na ma’ito o ia i le taimi na aafia ai, ma o loo ta’ua na maliu ai lea pepe a o le’i fanau mai.
O le isi tagata na maliu, o le to’alua o le tama’ita’i o Nicola, le alii o Bevan Tepu e 21 tausaga le matua ma le la atalii e 3 tausaga le matua.
Faaalia i faamatalaga o lenei faalavelave mata’utia, na uma ona faatino e Ratima le soligatulafono i sui o le aiga o lona to’alua ona faatalitali lea o le alii i lona to’alua o Toni ma nai ona tua’ā ia Phillip ma Tubby Ferguson.
Ma e ta’ua i le taunuu atu ai o Toni ma ona mātua i le latou fale ae osofa’i loa e Ratima le tua’ā o Toni le tamā ia Philip e faaaogā ai se pate taalo, softball bat.
Ina ua fesiligia Ratima e le laulauafono o loo iloiloina tulaga o palola, i le mafua’aga tonu o lona faatino ai o lea soligatulafono, na tali le alii ua 57 ona tausaga, o le ova tele o lona ita, ma lona lē fiafia i le oo atu o faamatalaga o le a tete’a ma Toni.
Faaalia e Ratima, i lena vaitaimi o lona lava mafaufau, a lē mafai ona ia toe mauaina lona to’alua, e leai la se isi e mafai ona toe mafuta fua i lona to’alua. “If I can’t have them, no one can.”
Na faasala i le to’ese Ratima i le i’uga e soloatoa i le falepuipui, ma e lē agavaa i le palola mo le 10 tausaga, ma ina ua mafai ona talosaga mo le palola o lea na faasolo mai ai loa ana talosaga ae pagā lea e le’i manuia lava ana taumafaiga.
Ua faamauina e lē o talia lava e aiga o ē ua maliliu le tatala ai i tua o Ratima, ma o le latou tala, afai ae tatala o ia i tua, e tatau ona tapu ona aumau ma toe nofo Ratima i le North Island.
I le toe teena ai o le talosaga a lenei alii, o lona uiga o le a toe faatali foi le isi 6 masina e toe talosaga ai, ae ia oo atu i lena taimi ua mae’a ona fai iai ni su’esu’ega i lona mafaufau (psychological assessments and a treatment programme).
Puna o Faamatalaga: https://www.nzherald.co.nz/nz/wellington/mass-murderer-raymond-wahia-ratima-declined-parole-explains-why-he-killed-seven-people
