Fai mai e toeitiiti o le tasi vae tolu o tagata sitiseni o Tuvalu ua talosaga mo se visa ua faaigoa landmark climate visa e aumau ai i Ausetalia a o faaauau pea le faamata’u mo lea atumotu i le siisii o le suāvai sami i ona laufanua.
O loo ofoina ane e Ausetalia i tausaga ta’itasi i tagata Tuvalu avanoa e 280 i lalo o se maliega tau femalagaa’iga mo Tuvalu ma ona sitiseni ma e silia ma le 3 afe tagata Tuvalu ua mae’a ona talosaga i le palota lea mo visa ulufale i lalo o lea maliega.
Faailoa i le RNZ se saunoaga mai le ofisa o le va i fafo a Ausetalia ua ta’ua ai e amana’ia e Ausetalia tulaga ogaoga o le suiga o le tau i le atumotu o Tuvalu ma lona saogalemu.
O le maliega la ua faia o le ulua’i maliega lea faapea ua faia i lea matāupu i le lalolagi ma o le a maua ai le avanoa mo tagata mai lea atumotu i Ausetalia.
Pe ā ma le silia i le 10,600 tagata Tuvalu o loo i le atumotu e fua i le tusigāigoa mulimuli na faia i le 2022 ma e $25 le totogi o le lesitala i le palota lea e tapunia le ‘autalosaga iai i le aso 18 o Iulai ma tālia ai loa suafa o i latou o le a faamanuiaina mo le ulua’i taimi i lalo o le visa fou lea a Ausetalia.
Puna o Faamatalaga: https://www.rnz.co.nz/news/world/565276/nearly-one-third-of-tuvalu-residents-apply-for-australian-climate-change-visa-programme
