Ua faamaonia mai nei e ala i se lipoti mai le leitio faavaomalo o Niu Sila, le tu’umālō ai o le tama’ita’i faipule o Takutai Tarsh Kemp, o se tasi o sui faipule o le vaega faaupufai o le Te Pāti Māori.
Na māua i lipoti, na auai atu le tama’ita’i faipule i tauaofiaga o le Palemene i Ueligitone i le Aso Lulu o lenei vaiaso, a o le’i toe taliu mai i Aukilani.
Faamauina foi, sa feagai le tama’ita’i ia Takutai ma nisi o faafitauli i lona soifua mālōlōina, e pei ona faamanino lona fetaia’i ai ma gasegase o le fatuga’o se’i tulou e pei ona mālōlō ai le tama’ita’i faipule i le tausaga na te’a nei.
Na ofi mai le Takutai Tarsh Kemp i upufai o malo i le atunuu, ina ua malolo le sui tauva o le Leipa (Peenei Hanare), ia te ia i le faigāpalota o le 2023 mo le itumalo o Tamaki Makaurau.
Faamaonia e fā lava palota na manumālō ai le tama’ita’i faipule i le faigāpalota.
Na avea lea tama’ita’i ma faauluuluga o le Manurewa Marae, ma le faatonu o le Hip Hop International.
I se pepa o faamatalaga mai le vaega faaupufai a le Te Pāti Māori, na faaalia ai lo latou faanoanoa tele i le tuumalo ai o le tama’ita’i ia Tekutai, ae latou te manatua pea le tautua alofa ma le lē faalogologo tīgā o le tama’ita’i faipule.
E pei ona latou faaalia, e ui lava ina feagai Tekutai ma gasegase ae sa vaaia lava le lē faavaivai ai o le sui a faipule e tula’i ma savali, e auai i faatasiga uma.
Na maitauina le to’atele o sui o le Palemene na momoli a latou faamaisega i luga o upega tafa’ilagi e faaalia lo latou alolofa mo Takutai.
Molimauina foi le momoli mai ai o faamaisega ma saafiafiga a ta’ita’i o vaega faaupufai a le Leipa, NZ First ma le ACT mo le tama’ita’i faipule.
Ma na tuumalo Takutai i le taeao analeila, i le na o le limasefulu tausaga o lona soifua.
Puna o Faamatalaga: https://www.rnz.co.nz/news/political/565187/te-pati-maori-mp-takutai-tarsh-kemp-dies
