Ua ufitia i le ao pogisa le pulega ma le aufaigaluega a le faalapotopotoga o faaputuga tupe o le lumana’i manuia o tagata poo le NPF o loo silafia tele ai lea auaunaga tuma’oti a le malo, i le tala faanoanoa i le valaau paia a le Atua i se tasi o tamalii sa tautua i le faalapotopotoga i le tofi ta’ita’ifono ma o se tasi foi o sui o le Komiti Faatonu, o lea faalapotopotoga a le malo le Susuga Papalii Panoa Tavita Moala.
O le po o le Aso Lulu e pei ona faailoa e se molimau faatuatuaina na tuumalo ai le Susuga Papalii poo le tofa Panoa Tavita Moala.
E lē toe tau faailoaina le tautua a lea tamalii i lo tatou malo ma le atunuu ona sa avea ma pule o le faalapotopotoga o le faleoloa o faato’aga i tausaga e tele ua mavae, aemaise foi sa avea ma Ofisa Sili o le pulega o le NPF.
Na toe filifilia e le malo i le tausaga e 2021 e avea ma sui o le Komiti Faatonu o lea faalapotopotoga tuma’oti a le malo ma avea ai ma Ta’ita’ifono, se’ia oo ina faasee ese i se masina e le’i mamao atu ma faaauau ai pea lana tautua i le avea ma sui o le Komiti Faatonu se’ia oo ina tuumalo.
O loo tapena ona tauaiga i polokalame o ona toe sauniga.
